Euz ar 3 d’an 9 a viz Du 2019
28b Tostaad a reas eur skrib ouz Jezuz, hag e houlennas outañ :
— « Pehini eo ar henta euz an oll hourhemennou ? »
29 Respont a reas Jezuz :
— « An hini kenta eo : Selaou Izrael, an Aotrou on Doue, n’eus Aotrou e-béd nemetañ. 30 Kared a ri an Aotrou da Zoue, a-greiz da galon, gand da oll ene, da oll spered ha da oll nerz.
31 Hag an eil eo hemañ : Kared a ri da nesa eveldout-te da unan. N’eus ket brasoh gourhemenn eged ar re-ze ».
32 Neuze, e lavaras ar skrib dezañ :
— « Mad-tre, Mestr ! Gwir eo ar péz az-peus lavaret : N’ez eus nemed eun Doue, ha n’eus hini all e-béd nemetañ. 33 Kared anezañ a-greiz kalon gand an oll nerz hag an oll spered, ha kared an nesa eveldor an unan a dalv muioh eged an oll brovou ha sakrifisou ».
34 O weled e-noa an dén-ze greet eur respont fur, e lavaras Jezuz dezañ :
— « N’emaout ket pell diouz Rouantèlèz Doue ».
Ha ne grede mui dén e-béd ober goulennou outañ.
1 O weled kement-se a dud o tond d’e heul, e savas Jezuz ouz tor ar menez ; azeza a reas, hag e tosteas e ziskibien outañ.
2 Neuze, e stagas da gelenn anezo en eur lavared :
3 « Eüruz ar re a zo paour a galon, rag dezo eo Rouantèlèz Doue.
4 « Eüruz ar re a zo leun a zouster, rag bez’ e vo an douar o lod.
5 « Eüruz ar re a ouel, rag frealzet e vezint.
6 « Eüruz ar re o-deus naon ha sehed euz ar justis, rag o gwalh a vo roet dezo.
7 « Euruz ar re a zo trugarezuz, rag d’o zro e kavint trugarez.
8 « Eüruz ar re a zo glan a galon rag gweled a rin Doue.
9 « Eüruz ar re a labour evid ar peoh, rag anvet e vezint bugale da Zoue.
10 « Eüruz ar re o-deus da houzañv abalamour d’ar justis, rag dezo eo Rouantèlèz Doue.
11 « Eüruz oh-c’hwi ma taol an dud dismegañs warnoh, ma reont brezel deoh, ma lavaront e gaou a bep seurt droug a-eneb deoh abalamour din-me.
12 « Bezit laouen ha tridit gand ar joa, rag digoll kaer ho-peus da gaoud en neñvou.
Lavared a ree Jezuz d’an dud :
37 « Ar re oll bet roet din gand va Zad, a zeuio beteg ennon ; hag an hini a zeu d’am haoud, ne vo ket taolet er-mêz ganin.
38 « Rag diskennet on euz an Neñv, evid ober, n’eo ket va bolontez, med bolontez an Hini on bet kaset gantañ.
39 « Ha bolontez an Hini on bet kaset gantañ eo : ne gollfen hini e-béd euz ar re e-neus roet din, med ma savfen anezo a varo da veo, d’an deiz diweza.
40 Rag bolontez va Zad eo : m’e-nefe ar vuhez peurbaduz ar re oll a wél ar Mab hag a gréd ennañ ; ha me a adsavo anezo a varo da veo d’an deiz diweza ».
Bodet e ziskibien en-dro da Jezuz war ar menez, e lavare dezo :
13 « Bez’ ez oh-c’hwi holen an douar. Med ma teu an holen da goll e vlaz, gand petra e vo roet dezañ en-dro ? N’eo mui mad da netra : taolet e vez er-mêz hag e vez breset gand treid an dud.
14 « Bez’ ez oh-c’hwi sklêrijenn ar béd. Eur gêr savet war gern eur menez ne hell ket beza kuzet.
15 « Ne vez ket enaouet eul lamp evid beza lakeet dindan an armel. Lakeet e vez war eur hantolor hag e skéd neuze da rei sklêrijenn d’an oll re a zo en ti.
16 « Evel-se, ra skedo ho sklêrijenn dirag an dud : neuze, o weled an oberou mad a rit, e rentint gloar d’ho Tad hag a zo en Neñv ».
25 Bez’ e oa eur maread a dud oh ober hent gand Jezuz. Distrei a reas war-zu enno ha lavared dezo :
26 –- « An néb a zeu d’am heul hep kared ahanon muioh eged e dad, e vamm, e wrég, e vugale, e vreudeur ha c’hoarezed, hag e vuhez e-unan zokén, hennez ne hell ket beza diskib din.
27 « An hini ne zoug ket e groaz evid dond d’am heul, ne hell ket beza diskib din ».
28 « Pehini ahanoh, c’hoant dezañ sevel eun tour, ne azez ket da genta da ober ar gont euz ar mizou, da weled ha peadra a-walh e-neus da gas al labour da benn ? 29 Rag ma ra an diazez ha n’eo ket gouest da beurechui e labour, e vo greet goap anezañ gand kement hini a welo anezañ, o lavared : 30 « Setu aze eun dén, staget gantañ da zevel eun tour, ha n’eo ket bet gouest da echui al labour ! »
31 « Pe c’hoaz : Peseurt roue, o vond da ober brezel d’eur roue all, ha ne azez ket da genta, evid gweled ha gouest eo, gand deg mil dén, da zelher penn ouz an hini a zeu dezañ gand ugent mil ? 32 Ma n’eo ket gouest, e-keid ha m’ema egile pell c’hoaz, e kas kannaded d’e gaoud evid goulenn digantañ ober ar peoh.
33 « Evel-se eta, an néb piou bennag ahanoh ha ne zilez ket kement a zo dezañ, ne hell ket beza diskib din ».
1 Bez’ e veze an oll bublikaned hag an oll beherien o klask mond tost da Jezuz evid selaou anezañ ; 2 grozmolad a ree ar Farizianed hag ar Skribed , en eur lavared :
— « Digemer vad a ra an dén-ze d’ar beherien, ha drebi ganto ».
3 Neuze, e lavaras Jezuz ar barabolenn-mañ dezo :
4 — « Piou ahanoh, hag e-neus kant dañvadez, ma teu dezañ koll unan anezo, na laosk ket an naonteg ha pevar-ugent all en dezert, evid mond war glask an hini a zo dianket, beteg ma vo kavet.
5 « Pa ’z eo kavet, e lak anezi gand levenez war e ziskoaz, 6 ha digouezet er gêr, e halv e vignoned hag e amezeien, hag e lavar dezo : « Bezit laouen ganin, rag kavet am-eus va dañvadez, an hini a oa kollet ».
7 « Evel-se, e lavaran deoh : Bez’ e vo brasoh levenez en Neñv, evid eur peher hepken troet e galon gantañ ouz Doue, eged evid naonteg ha pevar-ugent dén just ha n’o-deus ket ezomm trei o halon ».
8 « Pe c’hoaz, peseurt maouez dezi dég péz arhant, ma tigouez ganti koll unan anezo, ne elum ket ar goulou, ne skub ket he zi, ha ne glask ket gand evez beteg ma vo kavet ganti.
9 « P’he-deus kavet anezañ, e halv he mignonezed hag he amezegézéd, hag e lavar dezo : « Bezit laouen ganin, rag kavet em-eus ar péz arhant bet kollet ganin ».
10 « Evel-se, e lavaran deoh : Bez’ ez eus levenez e-touez êlez Doue diwar eur peher hepkén hag a dro e galon ouz Doue ».
1 Lavared a ree Jezuz d’e ziskibien :
— « Bez’ e oa eun dén pinvidig, dezañ eur merour. Disklêriet e oe dezañ e oa e verour o forani e vadou.
2 « Gelver a reas anezañ d’e gaoud, hag e lavaras dezañ :
— « Petra a glevan diwar da benn ? Rent kont din euz da verèrèz, rag hivziken ne helli ket beza va merour ».
3 « Lavared a reas ar merour outañ e-unan :
— « Petra a rin, pa lam va mestr va harg diganin ? Mond da labourad an douar ? N’am-eus ket nerz a-walh. Astenn va dorn evid kaoud va boued ? Méz am-befe. 4 Gouzoud a ran petra a rin evid ma vo tud da rei digemer din, pa vo kollet va harg ganin.
5 « Gelver a reas d’e gaoud, hini hag hini, ar re a oa dleour d’e vestr. D’ar henta e lavaras :
— « A begement out dleour d’am mestr ? »
6 « Respont a reas :
— « A gant barillad eoul ».
« Lavared a reas ar merour dezañ :
— « Kemer da baper-diskarg, azez, ha buan, skriv : hanter-kant ».
7 « Goude-ze, e lavaras da unan all :
— « Ha te, a begement out dleour ? »
— « A gant sahad gwiniz » emezañ.
— « Kemer da baper, eme ar merour, ha skriv : pevar-ugent ».
8 « Ha meuli a reas ar mestr ar merour dizonest-se evid e ampartiz ; evid gwir, bez’ ez eo bugale ar béd-man ampartoh kenetrezo eged bugale ar sklêrijenn.
Lavared a ree Jezuz d’e ziskibien :
9 Ahanta ! lavared a ran deoh : gand an arhant dizonest, grit mignoned deoh, evid, pa zeuio hemañ marteze da vankoud, beza digemeret ganto, en teltennou peurbaduz.
10 « An neb a heller kaoud fiziañs ennañ e traou dister, a heller kaoud fiziañs ennañ ive e traou braz. An neb a zo dizonest e traou dister, a zo ken dizonest all e traou braz.
11 « Ma n’oh ket bet dîn a fiziañs eta, gand an arhant dizonest, piou a fizio ennoh ar pinvidigeziou gwirion ?
12 « Ha ma n’oh ket bet dîn a fiziañs gand madou a zo da dud all, piou a roio deoh ar madou hag a zo deoh hoh-unan ?
13 « Ne hell servicher e-béd servicha daou vestr : pe e-no kasoni ouz unan ha karantez ouz egile, pe en em stago ouz unan, hag e tisprijo egile. Ne hellit ket servicha Doue hag an arhant, war eun dro ».
14 Pa gleve ar Farizianed kement-se, tud troet gand an arhant ma ’z int, e reent goap anezañ. 15 Neuze e lavaras Jezuz dezo :
— « Bez’ ez oh-c’hwi tud euz ar re a glask beza sellet outo evel tud just gand ar re all, med anaoud a ra Doue ho kalon ; rag evid gwir, ar péz a zo uhel evid an dud, a zo eun dra euzuz dirag daoulagad an Aotrou Doue ».
Attention, vous utilisez un navigateur peu sûr !