Ugentved sizunvez war ar bloaz (C)

Euz ar 17 d’an 23 a viz Eost 2025

Ugentved sul war ar bloaz (C)

Lk 12, 49-53

Lavared a ree Jezuz d’e ziskibien :

⁴⁹ « Deuet on da zigas tan war an douar, ha pegement e karfen e vefe krog a-benn bremañ !

⁵⁰ « Bez’ ez eus eur vadeziant hag am-eus da reseo, ha pegen enkrezet on beteg ma vo kaset kement-se da benn.

⁵¹ « Ha kavoud a ra deoh ez on deuet da lakaad ar peoh war an douar ? N’eo ket, a lavaran deoh, med kentoh an dizunvaniez. ⁵² Rag diwar-vremañ, en eun tiad a bemp dén e vo dizunvaniez etrezo : tri a-eneb daou, ha daou a-eneb tri ; ⁵³ disparti a vo : an tad a-eneb e vab, ar mab a-eneb e dad, ar vamm a-eneb he merh, ar verh a-eneb he mamm ; ar vamm-gaer a-eneb he merh-kaer, ar verh-kaer a-eneb he mamm-gaer ».

Lun

Mz 19, 16-22

¹⁶ Tostaad a reas eun dén ouz Jezuz o lavared dezañ :

— « Mestr, petra a vad am-eus da ober evid kaoud ar vuhez peurbaduz ? »

¹⁷ Respont a reas Jezuz dezañ :

— « Perag e rez goulennou ouzin diwar-benn ar péz a zo mad ? Doue eo an hini a zo mad, ha Doue hepkén ! M’az-peus c’hoant mond er vuhez, mir ar gourhemennou ».

¹⁸ — « Pere ? » emezañ.

Respont a reas Jezuz :

– « Ne lazi ket. Ne ri ket avoultriez. Ne laeri ket. Ne lavari ket falz-testeni. ¹⁹ Da dad ha da vamm a enori ; hag ive : da nesa a gari eveldout da-unan ».

²⁰ Lavared a reas ar paotr yaouank dezañ :

— « Kement-se am-eus miret penn-da-benn. Petra a vank din c’hoaz ? »

²¹ Respont a reas Jezuz dezañ :

— « M’az-peus c’hoant beza parfet, kee, gwerz kemend a zo dit, ha ro anezañ d’ar re baour, hag ez-po eun teñzor en neñvou. Goude-ze, deus d’am heul ».

²² O kleved kement-se, ez eas kuit ar paotr yaouank, pounner e galon, rag pinvidig braz e oa ».

Meurz

Mz 19, 23-30

²³ Lavared a ree Jezuz d’e ziskibien :

— « E gwirionez, e lavaran deoh : Eun dén pinvidig a vo dïêz braz dezañ mond e Rouantèlèz Doue. ²⁴ Lavared a ran deoh, eur wech c’hoaz : Êsoh eo d’eur hañval tremen dre eun toull-nadoz, eged d’eun dén pinvidig mond e Rouantèlèz Doue.

²⁵ O kleved ar homzou-ze, e oe souezet-maro an diskibien, hag e lavarent :

— « Piou eta a hello beza salvet ? »

²⁶ En eur zelled outo, e lavaras Jezuz :

— « An dud ez eo an dra-ze dreist d’o galloud, med Doue n’eus netra dreist d’e halloud ».

²⁷ Neuze e lavaras Pèr da Jezuz :

— « Ha ni hag on-eus dilezet pep tra evid mond d’az heul, petra a dalvezo kement-se deom ?

²⁸ Lavared a reas Jezuz dezo :

— « E gwirionez, e lavaran deoh : Pa vo renevezet ar béd a-béz, pa azezo Mab an Dén war e drôn a hloar, e vezot, c’hwi ive hag a zo deuet d’am heul, azezet war daouzeg trôn evid barn daouzeg meuriad Izrael.

²⁹ « Ha kement hini e-no dilezet tiez, breudeur, c’hoarezed, tad ha mamm, bugale pe barkeier, abalamour d’am ano, a resevo kant kwech muioh, ha da lod ar vuhez peurbaduz. ³⁰ Kalz re genta a vo da ziweza, kalz re ziweza a vo da genta ».

Merher

Mz 20, 1-16

Lavared a ree Jezuz ar barabolenn-mañ :

¹ « Heñvel eo Rouantèlèz Doue ouz eur penn-tiègèz, a yeas er-mêz kerkent ha tarz an deiz, da gemer e koumanant devezourien evid e winïeg.

² « Marhad a reas ganto evid eun diner an devez (da lavared eo : eur péz arhant), hag e kasas anezo d’e winïeg.

³ « Eet er-mêz war-dro nav eur, e welas reou all aze, war ar blasenn, oh ober netra. ⁴ Ha da re-ze, e lavaras :

— « Kit, c’hwi ive, d’am gwinïeg, hag e roin deoh ar péz a zo just ».

⁵ « Hag ez ejont.

« Eet adarre war-dro kreisteiz, ha war-dro teir eur, e reas kemend-all.

⁶ War-dro pemp eur, ez eas c’hoaz er-mêz, hag e kavas reou all eno, hag e lavaras dezo :

— « Perag oh chomet aze, a-héd an deiz, oh ober netra ?

⁷ « Respont a rejont dezañ :

— « Peogwir n’eus deuet dén e-béd da glask ahanom ».

« Lavared a reas dezo :

— « Kit c’hwi ive d’am gwinieg ».

⁸ « Deuet an abardaez, e lavaras mestr ar winieg d’e verour :

— « Galv an devezourien ha ro dezo o fae, en eur vond euz ar re ziweza d’ar re genta ».

⁹ « Dond a reas ar re a oa staget da labourad da bemp eur, hag e oe roet dezo beb a ziner.

¹⁰ Pa zeuas tro ar re genta, e soñje dezo kaoud muioh, med reseo a rejont, int ive, beb a ziner.

¹¹ En eur reseo o fae, e hrosmolent a-eneb ar penn-tiegez en eur lavared :

¹² « Ar re-mañ, digouezet da ziweza, n’o-deus greet nemed eun eurvez labour, hag ho-peus roet dezo kement ha deom-ni, hag on-eus bet da houzañv beh an deiz hag an dommder ».

¹³ « Respont a reas ar mestr da unan anezo :

— « Va mignon, ne ran tamm gaou e-béd ouzit. Daoust ha n’eo ket evid eun diner eo ez-poa greet marhad ganin ? ¹⁴ Kemer ar péz a zo dit, ha kerz en da hent. Felloud a ra din rei d’an diweza-mañ kement ha dit. ¹⁵ Daoust ha n’em-eus ket aotre da ober ar péz a garan gand ar péz a zo din ? Pe gwarizi a vefe en da galon abalamour ma ’z on mad ? »

¹⁶ « Evel-se e vo ar re ziweza da genta, hag ar re genta da ziweza ».

Yaou

Mz 22, 1-14

¹ Staga a reas Jezuz da gomz dre barabolennou :

² — « Heñvel eo Rouantèlèz Doue ouz eur roue oh ober lein-eured e vab. ³ Kas a reas e zervicherien da helver d’al lein ar re a oa bet pedet, med n’o-doa ket c’hoant ar re-mañ dond. ⁴ Kas a reas c’hoaz servicherien all en eur lavared dezo :

-– « Lavarit d’ar re a zo pedet : « Setu, pourchaset eo ar préd, lazet eo an tirvi hag al loened lard ; prést eo pep tra : deuit d’al lein-eured ».

⁵ « Med ne rejont ket a van, hag ez ejont, unan d’e bark, egile d’e genwerz. ⁶ Tapoud krog a reas ar re all er zervicherien, gwallgas anezo hag e oent lazet ganto.

⁷ « Eet droug ennañ, e kasas ar roue e zoudarded, hag e oe lazet ar vuntrerien ha lakeet an tan en o hêr.

⁸.« Lavared a reas neuze d’e zervicherien :

— « Prést eo al lein-eured, med an dud a oa bet pedet ne oant ket dîn da zond. ⁹ Kit eta dre ar hroaz-heñchou : pedit da zond d’al lein-eured an oll dud a gavot ».

¹⁰ « Mond a reas ar zervicherien dre an heñchou, boda an oll re a zigouezas ganto, fall ha mad, hag e oe leun a dud ar zal-eured.

¹¹ « Dond a reas ar roue da zelled ouz an dud a oa ouz taol, hag eno, e welas eun dén ne oa tamm dillad-eured.e-béd gantañ. ¹² Lavared a reas dezañ :

— « Va dén mad, penaoz out deuet amañ hep kaoud eun dillad-eured en dro dit ? »

« Ne lavaras grig. ¹³ Neuze e lavaras ar roue d’ar zervicherien :

— « Liammit dezañ e dreid hag e zaouarn, ha taolit anezañ er-mêz en deñvalijenn. Eno e vo daelou ha skrignadeg dent. ¹⁴ Rag kalz a zo galvet, nebeud a-vad a zo dibabet ».

Gwener 22 a viz Eost
Ar Werhez Vari, Rouanez

Lk 1, 26-38

²⁶ D’ar c’hwehved miz, e oe kaset an êl Gabriel gand Doue d’eur gêr a Vro-Halilea, anvet Nazared, ²⁷ da gaoud eur plah yaouank dimezet d’eun den anvet Jozef, euz lignez David, hag e oa Mari ano ar plah yaouank.

²⁸ Digouezet beteg enni, e lavaras an êl dezi :

— « Béz laouen, leun a hras ! Ema an Aotrou ganit ».

²⁹ O kleved seurt komzou, e oe hi strafuillet braz. Klask gouzoud e oa petra a dalveze ar zalud-se.

³⁰ Lavared a reas an êl dezi :

— « Na gemer ket aon, Mari, rag plijet out bet da Zoue. ³¹ Setu emaout o vond da veza dougéréz, hag e hani eur mab, hag e roi dezañ an ano a Jezuz. ³² Braz e vo, hag e vo anvet Mab da Vestr an Uhel-Meurbed. Trôn David e dad a vo roet dezañ gand an Aotrou Doue. ³³ Roue e vo war lignez Jakob da viken, hag e rouantèlèz ne vo fin e-béd dezi ».

³⁴ Lavared a reas Mari d’an êl :

— « Penaoz e c’hoarvezo kement-se, peogwir n’em-eus darempred gand gwaz ebed ? »

³⁵ Respont a reas an êl dezi :

— « Diskenn a raio ar Spered-Santel warnout, hag e vi goloet gand galloud Mestr an Uhel-Meurbed. Dre-ze, e vo santel ar hrouadur, hag e vo anvet Mab da Zoue. ³⁶ Ha setu ema Elizabed da geniterv o tougen eur mab ive, daoust d’he oad, hag an hini a veze greet anezi ar « vaouez dizeh », setu ema gand he c’hwehved miz ³⁷ Rag n’eus netra dreist galloud Doue. »

³⁸ Lavared a reas Mari neuze :

— « Setu amañ servichéréz an Aotrou, ra hoarvezo ganin hervez da lavar ».

Hag ez eas an êl kuit diouti.

Sadorn

Mz 23, 1-12

En amzer-ze, e tisplegas Jezuz kement-mañ d’ar bobl ha d’e ziskibien :

² — « Kelenn a ra ar Skribed hag ar Farizianed diwar gador Voizez. ³ Grit eta, ha mirit kement a lavaront deoh. N’it ket a-vad, da gemer skwer diwar o oberou, rag lavared a reont, ha ne reont ket.

⁴ « Eren a reont sammou pounner, ha karga anezo war ziouskoaz an dud, med ne fell ket dezo o-unan o diblas gand penn o biz.

⁵ « Kement a reont a-vad, eo evid beza gwelet gand an dud. Dougenn a reont warno o-unan rubanou ledan-kenañ, warno c’hoaz pennadou-skrid al Lezenn, hag ez eo hir-kenañ ar fleñch euz o mantilli. ⁶ Plijoud a ra dezo ar plasou a enor er prejou, ar plasou kenta er zinagogennou, ⁷ beza saludet war ar plasennou, ha beza anvet « rabbi » gand an dud.

⁸ « C’hwi a-vad, n’it ket da rei deoh an ano a « rabbi », rag n’ho-peus nemed eur mestr evid kelenn ahanoh, hag ez oh breudeur oll.

⁹ « Na roit da zén war an douar an ano a dad, rag n’ho-peus nemed eun Tad : an hini a zo en neñvou.

¹⁰ Na rit ket kennebeud rei deoh an ano a zoktor, rag n’ho-peus nemed eun doktor : ar Hrist.

¹¹ « An hini brasa en ho-touez, ra vo servicher deoh. ¹² Piou bennag en em lakaio uhel, a vo izelleet, ha piou bennag en em lakaio izel, a vo uhelleet.