Kenta sizunvez ha tregont war ar bloaz (C)

Euz an 2 d’an 8 a viz Du 2025

Sul 2 a viz Du
Gouel an Anaon

Yn 6, 37-40

Lavared a ree Jezuz d’an dud :

³⁷ « Ar re oll bet roet din gand va Zad, a zeuio beteg ennon ; hag an hini a zeu d’am haoud, ne vo ket taolet er-mêz ganin.

³⁸ « Rag diskennet on euz an Neñv, evid ober, n’eo ket va bolontez, med bolontez an Hini on bet kaset gantañ.

³⁹ « Ha bolontez an Hini on bet kaset gantañ eo : ne gollfen hini e-béd euz ar re e-neus roet din, med ma savfen anezo a varo da veo, d’an deiz diweza.

⁴⁰ Rag bolontez va Zad eo : m’e-nefe ar vuhez peurbaduz ar re oll a wél ar Mab hag a gréd ennañ ; ha me a adsavo anezo a varo da veo d’an deiz diweza ».

Lun 3 a viz Du
Sant Gwenael, abad.
Memor e Eskopti Kemper

Mz 5, 13-16

Bodet e ziskibien en-dro da Jezuz war ar menez, e lavare dezo :

¹³ « Bez’ ez oh-c’hwi holen an douar. Med ma teu an holen da goll e vlaz, gand petra e vo roet dezañ en-dro ? N’eo mui mad da netra : taolet e vez er-mêz hag e vez breset gand treid an dud.

¹⁴ « Bez’ ez oh-c’hwi sklêrijenn ar béd. Eur gêr savet war gern eur menez ne hell ket beza kuzet.

¹⁵ « Ne vez ket enaouet eul lamp evid beza lakeet dindan an armel. Lakeet e vez war eur hantolor hag e skéd neuze da rei sklêrijenn d’an oll re a zo en ti.

¹⁶ « Evel-se, ra skedo ho sklêrijenn dirag an dud : neuze, o weled an oberou mad a rit, e rentint gloar d’ho Tad hag a zo en Neñv ».

Lun

Lk 14, 12-14

Eet e oa Jezuz da zebri e ti unan euz pennou-braz ar Farizianed.

¹² Lavared a ree d’an hini e-noa pedet anezañ :

— « Pa rez eul lein pe eur goan, arabad dit pedi da vignoned, na da vreudeur, na da gerent, na da amezeien binvidig, gand aon da veza pedet ganto d’o zro, hag evel-se digollet.

¹³ « Er hontrol, pa rez lein vraz, péd tud paour, tud vahagnet, tud kamm, tud dall ; ¹⁴ eüruz e vezi rag ne hellont ket ober dit kemend-all : digollet e vezi pa zavo an dud just a varo da veo ».

Meurz

Lk 14, 15-24

E-pad eur préd e ti unan euz pennou-braz ar Farizianed, ¹⁵ o kleved Jezuz o kaozeal, e lavaras dezañ unan euz an dud pedet :

— « Eüruz an hini e-no perz er préd e Rouantèlèz Doue ! »

¹⁶ Respont a reas Jezuz dezañ :

— « Bez’ e oa eun dén o vond da rei eur goan vraz, hag e oa bet pedet e-leiz a dud gantañ. ¹⁷ Da vare ar préd, e kasas e zervicher da lavared d’an dud pedet gantañ :

— « Deuit ! Prést eo bremañ pep tra ».

¹⁸ « Oll a-unan a-vad, e stagjont da glask digareziou. Lavared a reas an hini kenta dezañ :

— « Eur park am-eus prenet, hag e rañkan mond da weled anezañ. Plijet ganit digarezi ahanon »

¹⁹ Gand unan all e teuas an digarez-mañ :

— « Pemp koublad ejenned emaon o nevez prena, hag ez an da esêa anezo. Plijet ganit digarezi ahanon ».

²⁰ Lavared a reas an trede :

— « Nevezig zo on dimezet, rag-se ne hellan ket mond ».

²¹ « Deuet en-dro, e kontas ar zervicher ar responchou-ze d’e vestr. Neuze, eet e fulor, e lavaras ar mestr d’e zervicher :

— « Kerz buan dre blasennou ha ruiou kêr ; digas amañ ar re baour, ar re mahagnet, ar re zall, ar re gamm ».

²² Dond a reas en-dro ar zervicher da lavared dezañ :

— « Mestr ! Greet eo bet kement az-poa gourhemennet, hag e chom plas c’hoaz.

²³ Neuze, e lavaras ar mestr d’e zervicher :

— « Kee dre an heñchou hag a-hed ar hleuziou, ha lak an dud da zond amañ, ma vo leun va zi. ²⁴ Rag lavared a ran deoh : Hini e-béd euz ar re a oa bet pedet, n’e-no an tañva euz va fréd ».

Merher

Lk 14, 25-33

²⁵ Bez’ e oa eur maread a dud oh ober hent gand Jezuz. Distrei a reas war-zu enno ha lavared dezo :

²⁶ –- « An néb a zeu d’am heul hep kared ahanon muioh eged e dad, e vamm, e wrég, e vugale, e vreudeur ha c’hoarezed, hag e vuhez e-unan zokén, hennez ne hell ket beza diskib din.

²⁷ « An hini ne zoug ket e groaz evid dond d’am heul, ne hell ket beza diskib din ».

²⁸ « Pehini ahanoh, c’hoant dezañ sevel eun tour, ne azez ket da genta da ober ar gont euz ar mizou, da weled ha peadra a-walh e-neus da gas al labour da benn ? ²⁹ Rag ma ra an diazez ha n’eo ket gouest da beurechui e labour, e vo greet goap anezañ gand kement hini a welo anezañ, o lavared : ³⁰ « Setu aze eun dén, staget gantañ da zevel eun tour, ha n’eo ket bet gouest da echui al labour ! »

³¹ « Pe c’hoaz : Peseurt roue, o vond da ober brezel d’eur roue all, ha ne azez ket da genta, evid gweled ha gouest eo, gand deg mil dén, da zelher penn ouz an hini a zeu dezañ gand ugent mil ? ³² Ma n’eo ket gouest, e-keid ha m’ema egile pell c’hoaz, e kas kannaded d’e gaoud evid goulenn digantañ ober ar peoh.

³³ « Evel-se eta, an néb piou bennag ahanoh ha ne zilez ket kement a zo dezañ, ne hell ket beza diskib din ».

Yaou

Lk 15, 1-10

¹ Bez’ e veze an oll bublikaned hag an oll beherien o klask mond tost da Jezuz evid selaou anezañ ; ² grozmolad a ree ar Farizianed hag ar Skribed , en eur lavared :

— « Digemer vad a ra an dén-ze d’ar beherien, ha drebi ganto ».

³ Neuze, e lavaras Jezuz ar barabolenn-mañ dezo :

⁴ — « Piou ahanoh, hag e-neus kant dañvadez, ma teu dezañ koll unan anezo, na laosk ket an naonteg ha pevar-ugent all en dezert, evid mond war glask an hini a zo dianket, beteg ma vo kavet.

⁵ « Pa ’z eo kavet, e lak anezi gand levenez war e ziskoaz, ⁶ ha digouezet er gêr, e halv e vignoned hag e amezeien, hag e lavar dezo : « Bezit laouen ganin, rag kavet am-eus va dañvadez, an hini a oa kollet ».

⁷ « Evel-se, e lavaran deoh : Bez’ e vo brasoh levenez en Neñv, evid eur peher hepken troet e galon gantañ ouz Doue, eged evid naonteg ha pevar-ugent dén just ha n’o-deus ket ezomm trei o halon ».

⁸ « Pe c’hoaz, peseurt maouez dezi dég péz arhant, ma tigouez ganti koll unan anezo, ne elum ket ar goulou, ne skub ket he zi, ha ne glask ket gand evez beteg ma vo kavet ganti.

⁹ « P’he-deus kavet anezañ, e halv he mignonezed hag he amezegézéd, hag e lavar dezo : « Bezit laouen ganin, rag kavet em-eus ar péz arhant bet kollet ganin ».

¹⁰ « Evel-se, e lavaran deoh : Bez’ ez eus levenez e-touez êlez Doue diwar eur peher hepkén hag a dro e galon ouz Doue ».

Gwener

Lk 16, 1-8

¹ Lavared a ree Jezuz d’e ziskibien :

— « Bez’ e oa eun dén pinvidig, dezañ eur merour. Disklêriet e oe dezañ e oa e verour o forani e vadou.

² « Gelver a reas anezañ d’e gaoud, hag e lavaras dezañ :

— « Petra a glevan diwar da benn ? Rent kont din euz da verèrèz, rag hivziken ne helli ket beza va merour ».

³ « Lavared a reas ar merour outañ e-unan :

— « Petra a rin, pa lam va mestr va harg diganin ? Mond da labourad an douar ? N’am-eus ket nerz a-walh. Astenn va dorn evid kaoud va boued ? Méz am-befe. ⁴ Gouzoud a ran petra a rin evid ma vo tud da rei digemer din, pa vo kollet va harg ganin.

⁵ « Gelver a reas d’e gaoud, hini hag hini, ar re a oa dleour d’e vestr. D’ar henta e lavaras :

— « A begement out dleour d’am mestr ? »

⁶ « Respont a reas :

— « A gant barillad eoul ».

« Lavared a reas ar merour dezañ :

— « Kemer da baper-diskarg, azez, ha buan, skriv : hanter-kant ».

⁷ « Goude-ze, e lavaras da unan all :

— « Ha te, a begement out dleour ? »

— « A gant sahad gwiniz » emezañ.

— « Kemer da baper, eme ar merour, ha skriv : pevar-ugent ».

⁸ « Ha meuli a reas ar mestr ar merour dizonest-se evid e ampartiz ; evid gwir, bez’ ez eo bugale ar béd-man ampartoh kenetrezo eged bugale ar sklêrijenn.

Sadorn

Lk 16, 9-15

Lavared a ree Jezuz d’e ziskibien :

⁹ Ahanta ! lavared a ran deoh : gand an arhant dizonest, grit mignoned deoh, evid, pa zeuio hemañ marteze da vankoud, beza digemeret ganto, en teltennou peurbaduz.

¹⁰ « An neb a heller kaoud fiziañs ennañ e traou dister, a heller kaoud fiziañs ennañ ive e traou braz. An neb a zo dizonest e traou dister, a zo ken dizonest all e traou braz.

¹¹ « Ma n’oh ket bet dîn a fiziañs eta, gand an arhant dizonest, piou a fizio ennoh ar pinvidigeziou gwirion ?

¹² « Ha ma n’oh ket bet dîn a fiziañs gand madou a zo da dud all, piou a roio deoh ar madou hag a zo deoh hoh-unan ?

¹³ « Ne hell servicher e-béd servicha daou vestr : pe e-no kasoni ouz unan ha karantez ouz egile, pe en em stago ouz unan, hag e tisprijo egile. Ne hellit ket servicha Doue hag an arhant, war eun dro ».

¹⁴ Pa gleve ar Farizianed kement-se, tud troet gand an arhant ma ’z int, e reent goap anezañ. ¹⁵ Neuze e lavaras Jezuz dezo :

— « Bez’ ez oh-c’hwi tud euz ar re a glask beza sellet outo evel tud just gand ar re all, med anaoud a ra Doue ho kalon ; rag evid gwir, ar péz a zo uhel evid an dud, a zo eun dra euzuz dirag daoulagad an Aotrou Doue ».