Accueil  -  C’hwehved sizunvez amzer Fask (B)

C’hwehved sizunvez amzer Fask (B)

Euz an 9 d’ar 15 a viz Mae 2021

C’hwehved sul Fask

Yn 15, 9-17 (B)

D’an eur ma oa Jezuz o tremen euz ar béd-mañ d’e Dad, e lavare d’e ziskibien :

9 « Evel m’e-neus va Zad karet ahanon, em-eus, me ive, karet ahanoh. Chomit em harantez. 10 Ma virit va gourhemennou, e chomot em harantez, evel ma choman-me e karantez va Zad en eur vired e hourhemennou. 11 Kement-se am-eus lavaret deoh, evid ma vo va levenez ennoh, ha ma vo leun-barr ho levenez.

12 « Hemañ eo va gourhemenn din-me : En em garit an eil egile, evel m’em-eus karet ahanoh. 13 N’eus ket brasoh karantez eged rei ar vuhez evid ar re a garer.

14 « Mignoned din e vezot, ma rit ar péz a hourhemennan deoh.

15 « N’eo ket an ano a zervicher a roan deoh hiviziken, rag ar zervicher ne oar ket petra a ra e vestr. Bremañ e roan deoh an ano a vignon, rag kement am-eus klevet gand va Zad em-eus roet deoh da anaoud.

16 « N’eo ket c’hwi eo ho-peus dibabet ahanon ; med me eo em-eus dibabet ahanoh, ha roet karg deoh da vond ha da zougenn frouez, ha frouez paduz. Neuze, kement a houlennot digand va Zad, em ano, a vo roet deoh.

17 « Ar péz a hourhemennañ deoh eo en em gared an eil egile ».

Lun

Yn 15, 26 – 16, 4

D’an eur ma oa Jezuz o tremen euz ar béd-mañ d’e Dad, e lavare d’e ziskibien :

26 « Pa zeuio ar Skoazeller a gasin-me deoh a-berz va Zad, Spered ar Wirionez a zeu euz an Tad, Eñ a roio testeni diwar va fenn. 27 Ha c’hwi ive, a roio testeni din, abalamour m’emaoh ganin abaoe ar penn kenta.

16. 1 Kement-se am-eus lavaret deoh evid mired ahanoh da veza feuket. 2 Taolet e vezot er-mêz euz ar zinagogennou ; dond a ra zokén an eur d’ar re a gaso ahanoh d’ar maro, ma kredo dezo kinnig eur zakrifis da Zoue. 3 Ober a raint kement-se abalamour n’o-deus anavezet nag an Tad na me. 4 Med lavared a ran kement-se deoh, evid m’ho-po soñj, pa zeuio an eur, em-boa lavaret deoh. N’em-eus ket lavaret ze adaleg ar penn kenta, peogwir e oan ganeoh ».

Meurz

Yn 16, 5-11

D’an eur ma oa Jezuz o tremen euz ar béd-mañ d’e Dad, e lavare d’e ziskibien :

5 « Mond a ran bremañ da gaoud an hini on bet kaset gantañ, ha ne houlenn hini e-béd ahanoh ouzin : « Da beleh emaout o vond ? » 6 Med ablamour m’em-eus lavaret an dra-ze deoh, eo bet karget ho kalon a dristidigez. 7 Koulskoude e lavaran deoh ar wirionez : Eun dra vad eo evidoh ez afen kuit, rag ma ne ’z an ket kuit, ne zeuio ket ar Skoazeller beteg ennoh ; med, ma ’z an kuit, e kasin anezañ deoh. 8 Hag e tiskouezo frêz d’ar béd ar pehed, ar justis hag ar varnedigez. 9 Ar pehed, e kement ha ne gredont ket ennon. 10 Ar justis, e kement ha ma ’z an da gaoud va Zad, ha ne welot mui ahanon. 11 Ar varnedigez, e kement ha m’eo bet barnet dija priñs ar béd-mañ ».

Merher

Yn 16, 12-15

D’an eur ma oa Jezuz o tremen euz ar béd-mañ d’e Dad, e lavare d’e ziskibien :

12 « Kalz a draou am-eus c’hoaz da lavared deoh, med n’oh ket evid dougenn anezo bremañ. 13 Pa zeuio ar Spered a Wirionez, e viot renet gantañ er wirionez penn-da-benn, rag ar péz a lavaro ne zeuio ket anezañ, med ar péz e-nevo klevet e vo lavaret deoh gantañ ; hag ar péz a zo da zond a vo ziskleriet deoh gantañ. 14 Gloar a roio din, rag kemer a raio euz ar péz a zo din, evid diskleria anezañ deoh. 15 Kement a zo e kerz an Tad a zo din-me ; setu perag em-eus lavaret deoh e tigemero ar Spered euz ar péz a zo din evid diskleria anezañ deoh ».

Ar Yaou-Bask (B)

Mk 16, 15-20

En amzer-ze, savet Jezuz a varo da veo, en em ziskouezas d’an unneg Abostol, hag 15 e lavaras dezo :

— « It dre ar béd ar-béz, embannit Kelou Mad an Aviel d’an oll Grouadèlèz. 16 An neb a gredo hag a vo badezet, a vezo salvet. An neb avad a zinaho kredi a vezo kondaonet.

17 Setu amañ ar zînou a vo da heul ar re o-devo kredet : em ano e kasint kuit an droug-sperejou ; yezou nevez a gomzint ; 18 tapoud krog a raint en naered, ha ma evont eun ampoezon marvel bennag, ne raio dezo droug e-béd ; astenn a raint o daouarn war ar re glañv, hag e wellaio ar re-mañ dezo ».

19 Neuze, goude beza komzet dezo evel-se, e oe douget an Aotrou Jezuz d’an Neñv, hag eh azezas en tu dehou da Zoue.

20 Mond a reas int-i a-vad da brezeg e pep leh. Labourad a ree an Aotrou a-unan ganto, hag e veze starteet ar Gomz gand hemañ dre ar zînou a zeue d’he heul.

Gwener 14 a viz Mae : Sant Mazeaz, abostol

Yn 15, 9-17

D’an eur ma oa Jezuz o tremen euz ar béd-mañ d’e Dad, e lavare d’e ziskibien :

9 « Evel m’e-neus va Zad karet ahanon, em-eus, me ive, karet ahanoh. Chomit em harantez. 10 Ma virit va gourhemennou, e chomot em harantez, evel ma choman-me e karantez va Zad en eur vired e hourhemennou. 11 Kement-se am-eus lavaret deoh, evid ma vo va levenez ennoh, ha ma vo leun-barr ho levenez.

12 « Hemañ eo va gourhemenn din-me : En em garit an eil egile, evel m’em-eus karet ahanoh. 13 N’eus ket brasoh karantez eged rei ar vuhez evid ar re a garer.

14 « Mignoned din e vezot, ma rit ar péz a hourhemennan deoh.

15 « N’eo ket an ano a zervicher a roan deoh hiviziken, rag ar zervicher ne oar ket petra a ra e vestr. Bremañ e roan deoh an ano a vignon, rag kement am-eus klevet gand va Zad em-eus roet deoh da anaoud.

16 « N’eo ket c’hwi eo ho-peus dibabet ahanon ; med me eo em-eus dibabet ahanoh, ha roet karg deoh da vond ha da zougenn frouez, ha frouez paduz. Neuze, kement a houlennot digand va Zad, em ano, a vo roet deoh.

17 « Ar péz a hourhemennañ deoh eo en em gared an eil egile ».

Sadorn

Yn 16, 23b-28

D’an eur ma oa Jezuz o tremen euz ar béd-mañ d’e Dad, e lavare d’e ziskibien :

23b « E gwirionez, e gwirionez e lavaran deoh : kement tra a houlennot digand va Zad, em ano, a vo roet deoh gantañ. 24 Beteg-henn n’ho-peus goulennet netra em ano. Goulennit hag e resevot, hag e vo leun-barr ho levenez.

25 « Kement-se am-eus lavaret deoh e parabolennou. Med dond a ra an eur ha ne gomzin ket ouzoh e parabolennou, med komz a rin frêz diwar-benn va Zad.

26 « En deiz-se, e houlennot em ano ; ha ne lavaran ket e pedin an Tad evidoh, 27 rag an Tad e-unan a gar ahanoh, abalamour m’ho-peus karet ahanon, ha m’ho-peus kredet ez on deuet euz Doue.

28 « Eet on er-mêz euz an Tad, ha deuet on er béd. Bremañ e kuitaan ar béd, hag ez an da gaoud an Tad ».