Euz ar 25 a viz Gwengolo d’ar 1a a viz Here 2022
En amzer-ze e lavare Jezuz d’ar Farizianed :
19 « Bez’ e oa eun dén pinvidig, gwisket gand mezer moug ha lin fin, hag a veze chervad gantañ bemdez.
20 « Bez’ e oa ive eur paour-kêz, Lazar e ano, a veze e toull an nor, war e hourvez, e gorv goloet a houliou. 21 C’hoant e-nefe bet da gavoud e damm boued diwar ar péz a goueze diouz taol an dén pinvidig, med ar chas eo kentoh a zeue da lipad e houliou.
22 « Hogen, mervel a reas ar paour-kêz, hag e oe douget gand an Êlez war gerhenn Abraham.
Mervel a reas ive an dén pinvidig, hag e oe laket er béz.
23 « O veza e bro an anaon, gwasket gand an tourmanchou, e savas e zaoulagad, hag e welas euz a bell Abraham ha Lazar tostig-tost outañ.
24 Hag eñ da youhal :
— « Abraham, va zad, béz truez ouzin ! Kas Lazar da zouba bég e viz en dour, evid distana din va zeod, rag poaniou kriz a ziwaskan e kreiz an tan-flamm-mañ ».
25 « Respont a reas Abraham :
— « Va mab, béz soñj : resevet ’peus da lod eürusted e-pad da vuhez, ha Lazar e lod a boaniou. Bremañ, ez eo-eñ frealzet amañ, ha te, gwasket.
26 « Ouspenn-ze, etre c’hwi ha ni, ez eus bet lakeet eun toull-don, kén na hell ket ar re a garfe na tremen a-hann evid mond d’ho kaoud, na tremen alese evid dont d’or haoud ».
27 — « Neuze, va zad, eme an dén pinvidig, goulenn a ran diganit, kas Lazar da di va zad din-me ; 28 pemp breur am-eus, evid rei dezo da houzoud penaoz ema kont amañ, evid ma ne zeuint ket, int-i ive, el leh-mañ a dourmanchou.
29 « Respont a reas Abraham :
— « Bez’ o-deus Moïzez hag ar Brofeted, n’o-deus nemed selaou anezo ».
30 — « N’eo ket, Abraham va zad, eme adarre an dén pinvidig, med, ma teu unan bennag euz a douez ar re varo, e troint ouz Doue ».
31 Respont a reas Abraham dezañ :
— « Ma ne zelaouont na Moïzez, nag ar Brofeted, ha goude ma savfe unan bennag a-douez ar re varo, ne gredfent ket ennañ ».
46 Sevel a reas trouz etre an diskibien evid gouzoud pehini anezo a oa ar brasa ?
47 O houzoud petra a zoñjent, e kemeras Jezuz eur paotrig ; lakaad a reas anezañ en e-gichenn, 48 hag e lavaras :
— « An neb a zigemer ar bugel-mañ em ano, am digemer, me va-unan. Hag an neb am digemer, a zigemer an hini on bet kaset gantañ. Rag an hini bihanna en ho-touez, hennez eo ar brasa ».
49 Lavared a reas Yann, unan euz an Daouzeg, da Jezuz :
— « Mestr, gwelet on-eus eun dén o kas kuit droug-sperejou en da ano ; miret on-eus outañ da ober kement-se, peogwir ne zeu ket ganeom d’az heul ».
50 Respont a reas Jezuz dezañ :
— « Na virit ket outañ : an neb n’ema ket a-eneb deoh, a zo a-du ganeoh ».
51 O veza ma oa o tostaad an amzer evid Jezuz da veza douget d’an Neñv, ez eas en hent, youl ennañ, war-zu Jeruzalem.
52 Kas a reas kannaded en e-raog. Mond a reas ar re-mañ en hent ha digouezoud en eur vourhadenn Samaritaned, evid reñka kement a oa réd. 53 Med ne fellas ket da re-mañ digemer anezañ, abalamour ma oa o vond war-zu Jeruzalem.
54 O kleved kement-se, e lavaras Jakez ha Yann, diskibien dezañ :
— « Aotrou, ma kerez, e roim urz d’an tan da ziskenn euz an neñv evid distruja anezo ».
55 Trei a reas Jezuz war-zu enno, ha gourdrouz anezo. 56 Hag ez ejont d’eur vourhadenn all.
57 Dre ma oa Jezuz oh ober hent, e lavaras eun dén dezañ :
— « Mond a rin en da heul, e kement leh ma ’z i.
58 Respont a reas Jezuz dezañ :
— « Bez’ o-deus al louarned o zoullou, laboused an neñv, o neiziou. Mab an Dén a-vad, n’e-neus leh e-béd da lakaad e benn da ziskuiza ».
59 Da unan all, e lavaras :
— « Deus d’am heul ».
Respont a reas an dén :
— « Laosk ahanon da vond da zebelia va zad da genta.
60 Ha Jezuz dezañ d’e dro :
— « Laosk ar re varo da zebelia o zud varo. Evidout-te, kerz da embann Rouantèlèz Doue ».
61 Lavared a reas unan all dezañ c’hoaz :
— « Aotrou, mond a rin d’az heul, med a-raog, ro aotre din da lavared kenavo da dud va ziad ».
62 Ha Jezuz dezañ :
— « N’eo ket greet evid Rouantèlèz Doue, an hini a zell a-dreñv, goude beza kroget en alar ».
47 Pa wél Jezuz Natanael o tond war-zu ennañ, e lavar diwar e benn :
— « Setu evid gwir eun Izraelad : n’eus netra faoz ennañ ».
48 Goulenn a ra Natanael outañ :
— « A-beleh eh anavezez-te ahanon ? »
Respont a ra Jezuz dezañ :
— « Araog ma ’z out bet galvet gand Filip, pa oas dindan ar wezenn-fïez, em-eus gwelet ahanout ».
49 Ha Natanael dezañ :
— « Rabbi, bez’ ez out Mab Doue ! Bez’ ez out Roue Izrael ! »
50 Respont a ra Jezuz dezañ :
–-« Abalamour m’em-eus lavaret dit : « Gwelet em-eus ahanout dindan ar wezenn- fiez », e kredez ! Brasoh eged-se e weli. »
51 Hag e lavar c’hoaz :
— « E gwirionez, e gwirionez, e lavaran deoh : Gweled a reot an Neñv digor, hag Êlez Doue o sevel hag o tiskenn a-uz da Vab an Dén ».
Lavared a ree Jezuz en eur gomz d’an daouzeg diskib ha tri-ugent :
13 « Gwaz-a-ze dit Korazaïn ! Gwaz-a-ze dit Betsaida ! Rag ma vije bet en em gavet e Tir hag e Sidon ar burzudou en em gavet en o touez, o-defe troet o halon ouz Doue abaoe pell ’zo, gwisket gand sehier hag azezet war al ludu.
14 « Ya, da Zeiz ar Varn, e vo skañfoh ar zetañs evid Tir ha Sidon, ha ma vo evidoh-c’hwi.
15 « Ha te, Kafarnaom, daoust ha savet e vezi beteg an Neñv ? Ne vezi ket, diskenn a ri beteg bro ar maro.
16 « An hini a zelaou ahanoh, me eo a zelaou ; an hini a ya a-eneb deoh, a-eneb din eo ez a ; hag an hini a ya a-eneb din, a-eneb d’an hini on bet kaset gantañ, eo ez a ».
1 Tostaad a reas an diskibien ouz Jezuz, hag e lavarjont dezañ :
— « Piou ’ta eo ar brasa e Rouantèlèz Doue ? »
2 Neuze, e halvas Jezuz eur bugelig ; lakaad a reas anezañ dirazo, 3 hag e tiskêrias :
— « E gwirionez, e lavaran deoh : ma ne jeñchit ket evid dond da veza heñvel ouz ar vugale, ne ’z eot ket e Rouantèlèz Doue. 4 Med an hini en em lakaio izel evel ar bugel-mañ, hennez eo ar brasa e Rouantèlèz Doue.
17 Laouen braz e teuas en-dro an daouzeg diskib ha tri-ugent, hag e lavarent :
— « Aotrou, plega deom a ra an diaouled o-unan en da ano ».
18 Lavared a reas Jezuz dezo :
— « Gweled a reen Satan o koueza euz an neñv evel eur flamm-tan. 19 Roet am-eus deoh galloud da vale war an naered hag ar hruged, ha da drehi oll nerz an enebour, heb na hellfe noazoud deoh.
20 « Koulskoude, n’eo ket abalamour ma sent ouzoh ar sperejou eo ho-peus da veza laouen, med abalamour m’eo sknvet hoh ano en Neñvou ».
21 D’an ampoent, e tridas kalon Jezuz gand al levenez er Spered-Santel, hag e lavaras :
— « Va Zad, Mestr an neñv hag an douar, meuleudi a roan dit : kement az-peus kuzet ouz an dud fur ha speredeg, a zo bet roet ganit da anaoud d’ar re vihannig. Ya, va Zad, plijet eo bet dit ober evel-se.
22 « Gand va Zad eo bet roet din kement a zo ; ne anavez dén ar Mab nemed an Tad, ha dén ne anavez an Tad nemed ar Mab, hag an hini a blij d’ar Mab rei dezañ da anaoud ».
23 O trei neuze war-zu e ziskibien, e lavaras dezo en o fart-o-unan :
— « Eüruz an daoulagad a wél ar péz a welit. 24 Rag lavared a ran deoh : Stank eo bet ar brofeted hag ar rouaned o-deus bet c’hoant gweled kement a welit-c’hwi, ha n’o-deus ket gwelet, kleved kement a glevit, ha n’o-deus ket klevet ».
Attention, vous utilisez un navigateur peu sûr !