Euz ar 15 d’an 21 a viz Genver 2023
29 O weled Jezuz o tond war-zu ennañ, e lavaras Yann-Vadezour :
— « Setu Oan Doue, an hini a zilam pehed ar béd ! 30 Hemañ eo an hini am-eus lavaret diwar e benn : « War va lerh e teu eun dén hag a zo eet e biou din, rag em-raog e oa anezañ ». 31 Ha me ne anavezen ket anezañ ; med deuet on da vadezi en dour evid ma vefe roet da Izrael da anaoud anezañ ».
32 Neuze e roas Yann an testeni-mañ :
— « Gwelet em-eus ar Spered, evel eur goulm, o tiskenn euz an Neñv, hag o chom warnañ. 33 Ha ne anavezen ket anezañ, med an hini e oan bet kaset gantañ da vadezi en dour, e-noa lavaret din : « An hini a weli ar Spered o tiskenn hag o chom warnañ, hennez eo a vadez er Spered-Santel ».
34 « Ya, gwelet em-eus, hag e roan an testeni-mañ : hennez eo Mab Doue ».
18 Eun devez ma oa diskibien Yann hag ar Farizianed oh ober yun, e teuas tud da houlenn ouz Jezuz :
— « Perag ne yun ket da ziskibien dit-te, evel ma ra diskibien Yann ha re ar Farizianed ? »
19 Respont a reas Jezuz :
— « Daoust ha deread eo da gompagnuned an dén-nevez ober yun e-keid ha m’ema ganto ? Keid ha m’ema an dén-nevez ganto, n’eus tu e-béd dezo da ober yun.
20 « Dond a raio eun amzer a-vad, ma vo lamet an dén-nevez diganto ; en deiz-se e raint yun.
21 « Ne zeu dén e-béd da beñselia eur gwiskamant koz gand eun tamm peñsel nevez ; a-hend-all, e sach ar peñsel nevez war an danvez koz hag e rog anezañ gwasoh.
22 « Pe c’hoaz, ne laka dén e-béd gwin nevez e seier-lèr koz. A-hend-all, gand ar gwin e teu ar zeier-lèr da darza ; kollet e vez ar gwin koulz hag ar zeier-lèr. Evid gwin nevez, seier-lèr nevez ».
23 Eun devez sabat, e oa Jezuz o vond dre barkajou gwiniz. Ha dre ma’z eent, e kutuille e ziskibien pennou éd. 24 Lavared a ree ar Farizianed :
— « Sell ’ta petra ema da ziskibien oh ober da zeiz ar zabat ! Eun dra difennet ».
25 Respont a reas Jezuz dezo :
— « Ha n’ho-peus ket lennet morse ar pez a reas David, pa oa en diénéz ha naon dezañ, ha d’an dud a oa gantañ ?
26 Mond a reas e ti Doue, en amzer ha ma oa Abiatar ar Beleg-Braz : drebi a reas baraennou ar hinnig, ha n’eus nemed ar veleien hag o-deus urz da zrebi anezo, hag e roas ive d’ar re a oa gantañ ».
27 Lavared a ree Jezuz dezo c’hoaz :
— « Greet eo bet ar zabat evid an dud, ha n’eo ket an dud evid ar zabat ; 28 Abalamour da-ze, eo Mab an Dén mestr war ar zabat zokén ».
1 Eur wech, ez eas Jezuz en eur zinagogenn. Bez’ e oa eno eun dén, dezañ eun dorn dizehet.
2 War evez e oa an dud o klask gouzoud hag-eñ e rafe ar pare da zeiz ar zabat ; evid kaoud digarez da damall anezañ.
3 Lavared a reas Jezuz d’an dén dizeh e zorn :
— « Sao en da zav, amañ dirag an oll ».
4 Neuze, e lavaras d’an dud :
— « Hag aotre a zo d’eun deiz sabat da ober ar mad, pe da ober an droug ? da zavetei e vuhez da unan bennag, pe da laza anezañ ? »
Chom a reent sioul avad.
5 Neuze, o taoler warno eur zell a gounnar, e oe poaniet gand ar hriz ma oa o halon, hag e lavaras d’an dén :
— « Astenn da zorn ».
Henn astenn a reas, hag e teuas ar pare d’e zorn.
6 Eur wech eet er-mêz, en em glevas ar Farizianed gand ar re a-du gand Herodez a-eneb Jezuz, evid klask an tu da lakaad anezañ d’ar maro.
7 En em denna a reas Jezuz gand e ziskibien war bord ar mor. Deuet e oa d’e heul tud e-leiz euz Bro-Halilea, euz Bro-Judea ive, 8 hag euz Jeruzalem. Euz Bro-Idumea hag euz an tu all d’ar Jordan, euz tro-war-droiou Tir ha Sidon ive e teuas tud e-leiz beteg ennañ, diwar ar vrud euz kement a ree.
9 Goulenn a reas Jezuz digand e ziskibien delher eur vag prést evitañ, rag kement a dud a oa ma oa gwasket ganto. 10 Ken stank e oa an dud e-noa pareet, m’en em daole warnañ, evid touch outañ, ar re a oa taget gand kleñved pe gleñved.
11 Pa welent anezañ, en em daole ar sperejou hudur, e-harz e dreid, hag e youhent :
— « Mab Doue out ».
12 Med urz a roe dezo groñs da jom heb lakaad anezañ da veza anavezet gand dén e-béd.
13 Sevel a reas Jezuz war ar menez, hag e halvas ar re a felle dezañ. Dond a rejont d’e gaoud. 14 Dibab a reas daouzeg da jom gantañ, ha da veza kaset da brezeg, 15 gand ar galloud da argas an droug-sperejou.
16 Dibab a reas eta an daouzeg : Pèr, an ano roet gantañ da Zimon. 17 Jakez mab Zebede, ha Yann breur Jakez, anvet o-daou gantañ Boanergez, da lavared eo : paotred ar gurun. 18 Andre, Filip, Berteleme, Maze, Tomaz, Jakez mab Alfe, Simon ar gredeg, 19 ha Judaz Iskariot, hennez end-eün an hini a werzas Jezuz.
20 Dond a reas Jezuz d’ar gêr, hag adarre e oa leun a dud war e dro, ken na helle dén drebri eun tamm bara zokén.
21 Pa glevas tud e famill kement-se, e teujont beteg ennañ evid kas anezañ ganto, rag lavared a reent : « Kollet eo e benn gantañ ».
Attention, vous utilisez un navigateur peu sûr !