Salm 24

(Heb. 25)

Gra din anaoud da heñchou, Aotrou,
Heñch ahanon en da wirionez !

¹ Beteg ennout Aotrou, e savan va ene,
Beteg ennout va Doue.

² Ennout e fizian, kuit din da gaoud mez,
Ne vo ket laouen va enebourien diwar va c’houst !
³ Neb a esper ennout a vez kuit a vez,
Ar vez ’zo ’vid an dreitourien didalvez.

⁴ Diwarbenn da heñchou Aotrou, ro din deskamant,
Kentel diwarbenn da wenojennou.
⁵ Heñch ahanon en da wirionez,
Kenteill ahanon, Te, va Doue Salver.

Te hag a c’hortozan e-pad an deiz *
⁶ Bez soñj euz da drugareziou, Aotrou,
Euz da garantez hag a zo a-viskoaz ;
⁷ Euz pehejou va yaouankiz,
      euz va mankou na zalc’h ket soñj,
Med dre garantez soñj ennon,
Te hag a zo ken mad Aotrou.

⁸ Mad ha just eo an Aotrou,
Ragse e kelenn d’ar beherien an hent.
⁹ Heñcha ’ra an dud izel hervez ar justis,
Deski a ra d’an dud izel o hent.

¹⁰ Oll wenojennou an Aotrou a zo karantez ha feiz
Evid an hini a vir e emgleo ha reoliou.
¹¹ Ablamour d’az Ano Aotrou,
E pardoni va fehed, pegen braz e ve.

¹² Kement hini en-devo doujañs e-keñver an Aotrou,
An Aotrou a zesko dezañ an hent da zibab.

¹³ E ene a jomo en eurvad,
D’e lignez e vezo ar vro.
¹⁴ Sekred an Aotrou a zo ’vid ar re a zouj anezañ ;
Dezo e ro da anaoud e emgleo.

         *

¹⁵ Va daoulagad a zo bepred etrezeg an Aotrou :
Eñ a denno va zreid euz ar roued.
¹⁶ Sell ouzin, bez truez ouzin,
Rag va unan, ha reuzeudig ez on !

¹⁷ Franka va c’halon en anken,
Euz peb enkrez tenn ahanon.
¹⁸ Sell, nag a boan hag a zoan am-eus,
Ha dilamm va oll behejou.

¹⁹ Sell ouz va enebourien ken niveruz,
Na pebez kasoni diroll o-deus ouzin.
²⁰ Diwall va ene ha saveta ahanon ;
Kuit din da gaoud mez : va fiziañs ’zo ennout !

²¹ Onestiz ha gwirionez a ziwall ahanon,
Esperoud a ran ennout !
²² O Doue, dizamm lzrael
Euz e oll enkreziou !

Bez soñj ouzin en da garantez !