Salm 90

(Heb. 91)

An Aotrou a c’holo ahanout gand e ziouaskell ;
Ne vezi ket spontet gand spont an noz.

¹ An hini a zo o chom e gwasked an Aotrou,
Hag a zeu da dremen an noz e skeud an oll-c’halloudeg,

² A lavar d’an Aotrou : « Va c’hastell, va minihi,
Doue am euz fiziañs ennañ ! »

³ Eñ eo a denn ahanout
Euz roued ar chaseour hag euz ar vosenn noazuz.

⁴ Gand e blu e holo ahanout,
Ha dindan e ziouaskell e kavez eur minihi.

⁵ Ne vezi ket spontet gand spont an noz,
Na gand ar bir a nij e-kreiz an deiz.

⁶ Na gand ar vosenn a vale en deñvalijenn
Na gand al lorgnez a zistruj da greisteiz.

⁷ Koueza ’ray mil en da gichenn
Ha deg mil a-zehou dit.

Med te, n’out tizet gand hini ebed,
Da skoed, da c’hobregon : e wirionez.

⁸ Sell hepken, ha da zaoulagad a welo,
Hag e weli kastiz ar beherien.

⁹ Rag te ’peus lavaret : « An Aotrou, va goudor ! »
Hag an Uhel-meurbed eo da vinihi.

¹⁰ Droug ebed n’hello koueza warnout,
Na reuz ebed tostaad ouz da deltenn.

¹¹ Rag d’e êlez e-neus roet an urz
Da ziwall ahanout en da oll henchou.

¹² War balv o daouarn e tougint ahanout,
Gand aon na stokfe da droad ouz eur mên.

¹³ War an naer hag an aspig e kerzi,
Hag e flastri al leon hag an aerouant.

¹⁴ « Peogwir ec’h en em stag ouzin, e savetaan anezañ
Trec’h e vo, rag anaoud a ra va Ano.

¹⁵ Va gervel a ra hag e respontan dezañ, *
En enkrez, setu m’emaon gantañ ;
Frankiz ha va gloar a roan dezañ.

¹⁶ Bez’ e-no e walc’h a hirder a zeiziou,
Hag e rin dezañ gweled va zilvidigez. »

Sell hepken, ha da zaoulagad a welo ar zilvidigez !