Salm 96

(Heb. 97)

Aotrou, Te eo an Uhel-meurbed war an douar a-bez !

¹ An Aotrou a ren ! Ra drido an douar,
Levenez en inizi niveruz !

² Koumoul ha koabrenn e-neus en-dro dezañ,
Justis ha gwir eo diazez e drôn.

³ Eun tan en e raog o vond
A bulluc’h tro-war-dro e enebourien.

⁴ E luhed a sklerijenn ar bed,
An douar a wel hag a gren.

⁵ Ar meneziou a deuz evel koar dirag an Aotrou,
Dirag mestr an douar a-bez.

⁶ Embann a ra an neñvou e justis,
Hag an oll boblou a wel e c’hloar.

⁷ Mez da oll zervicherien an idolou, *
A en em veule gand o falzdoueou !
Daoulinet dirazañ an oll zoueou !

          *

⁸ Sion a glev ha laouen eo ! *
Dañsal a ra merhed Youda,
Ablamour d’ho parnedigeziou, Aotrou !

⁹ Te, Aotrou, eo an Uhel-meurbed war an douar a-bez,
Kalz uhelloc’h eged an oll zoueou !

¹⁰ C’hwi a gar an Aotrou, kasait an droug ! *
Diwall a ra eneou e vignoned,
Euz dorn an dud fallagr e tenn anezo.

¹¹ Eur sklerijenn a darz evid an den just,
An den eeun a galon en devo levenez.

¹² Tud just, levenez deoc’h en Aotrou,
Meulit e Ano santel.

Ra vo an Aotrou ho levenez, meulit e Ano santel.