Euz ar 16 d’an 22 a viz Here 2019
1 Lavared a reas Jezuz d’e ziskibien eur barabolenn da gelenn ez eo red pedi dalhmad hep koll kalon :
2 « Bez’ e oa, emezañ, en eur gêr bennag, eur barner ha ne oa ket ennañ tamm doujañs ebed evid Doue ; ne oa ket nehet kennebeud gand an dud.
3 « Bez’ e oa ive er gêr-ze, eun intañvez hag a zeue d’e gaoud o lavared : « Ro eur varnedigez din a-eneb va enebour ».
4 « E-pad hir amzer ne fellas ket dezañ. A-benn ar fin, e lavaras ennañ e-unan :
— « Daoust ma n’em-eus ket a zoujañs evid Doue, ha daoust ma n’on ket nehet gand an dud, 5 koulskoude, gand ar skuiz ma ’z on eet o kleved anezi, ez an da rei dezi he goulenn, gand aon na zalhfe da derri din va fenn ».
6 « Lavared a reas an Aotrou ouspenn :
— « Selaouit mad ar péz a lavar ar barner disleal-ze. Ha Doue ne rentfe ket justis d’an dud dibabet gantañ, a zo o youhal noz-deiz war-zu ennañ ? Hag ober a ra dezo gortoz ?
7 « Lavared a ran deoh : Ne vezo ket pell evid rei o gwir dezo. 8 Evelato, pa zistroio Mab an Dén, daoust ha kavoud a raio ar feiz war an douar ? »
13 A-douez ar bobl, e lavaras eun dén da Jezuz :
— « Mestr, lavar d’am breur rei din va lod euz on heritaj ».
14 Respont a reas Jezuz dezañ :
— « Va dén ! Piou e-neus lakeet ahanon da varner warnoh, pe da reñka ho heritaj ? » 15 Hag e lavaras d’an oll : « Diwallit ouz pep c’hoantègèz direiz : talvoudègèz buhez eun dén, ha pa vefe pinvidig, ne zeu ket euz e vadou ».
16 Hag e kontas dezo ar barabolenn-mañ :
17 — « Bez’ e oa eun dén pinvidig. Gounidou braz e-noa greet gand e diègèz, hag e soñje ennañ e-unan : « Petra a rin, pa n’am-eus ket a blas da lakaad va eost ?
18 « Setu, emezañ, petra a rin : diskar va solierou ha sevel re all frankoh, hag e tastumin enno va éd ha kement am-eus. 19 Neuze e lavarin din-me va-unan : Setu ahanout gand madou braz dit evid kalz a vloaveziou. Dit diskuiza, debri, eva, ebati ».
20 « Med lavared a reas Doue dezañ : « Diskiant ma ’z out ! En noz-mañ, end-eün, e vo goulennet da ene diganit. Hag ar péz az-peus berniet, da biou e vo ? »
21 « Evel-se ema kont gand an hini a zastum madou evitañ e-unan, e-leh sevel da binvidig dirag Doue ».
1 E touez e ziskibien, e tibabas Jezuz daouzeg ha tri-ugent all, hag e kasas anezo, daou-ha-daou, en e-raog, da vond e kement kêr ha kement leh m’ e-noa e-unan da vond enno. 2 Lavared a reas dezo :
— « Braz eo an eost, med micherourien a zo nebeud anezo. Pedit eta mestr an eost, ma kaso micherourien da ober an eost.
— 3 « It en hent ; setu ma kasan ahanoh evel deñved e-touez bleizi. 4 Na gasit ganeoh na yalh, na sah, na sandalennou.
Arabad chom en hent da zaludi dén e-béd. 5 E kement ti ma ’z eot ennañ, lavarit da genta : « Peoh d’an ti-mañ ». 6 Ma ’z eus eno eun dén a beoh, e tiskenno ho peoh warnañ. Ma n’eus ket, e teuio deoh en-dro.
7 « Chomit er memez ti. Debrit hag evit euz ar péz a vo roet deoh, rag gounid a ra ar micherour e voneiz. Arabad deoh mond euz eun ti d’egile.
8 « E kement kêr ma ’z eot, hag ho-po enni digemer vad, debrit ar péz a vo kinniget deoh. 9 Roit ar pare d’ar re glañv a vo er gêr-ze, ha lavarit dezo : « Deuet eo beteg ennoh Rouantèlèz Doue ».
Lavared a ree Jezuz d’e ziskibien :
39 « Gouzoud a rit er-vad : ma ouezfe mestr an ti da béd eur e teuio al laer, ne laoskfe ket toulla moger e di.
40 « C’hwi ive, bezit prést : d’an eur na gav ket deoh, eo e teuio Mab an Dén ».
41 Neuze e lavaras Pèr :
— « Aotrou, evidom-ni eo e lavarez ar barabolenn-ze, pe evid an oll ?
42 Respont a reas an Aotrou :
— « Pehini eo ar merour féal ha fur a vo lakeet gand e vestr e penn e zervicherien, evid rei da bep hini, er poent, e lod gwiniz ? 43 Eüruz ar zervicher-ze a vo kavet gand e vestr oh ober evel-se, pa zistroio. 44 E gwirionez, e lavaran deoh : lakaad a raio anezañ da vestr war e oll vadou.
45 « Med, ma lavar ar zervicher-ze ennañ e-unan : « Dalea a ra va mestr da zond », ha ma stag da skei gand ar vevelien hag ar mitizien, da zebri, da eva, ha d’en em vezvi, 46 neuze, pa zigouezo ar mestr d’an devez n’ema ket e zervicher o hortoz, ha d’an eur ne oar ket, e kaso anezañ diwar e dro, hag e vo lakeet gantañ e-touez an dud difeiz.
47 « Paka a raio kalz taoliou ar zervicher, hag a anavez bolontez e vestr, ha n’e-neus aozet netra, na greet hervez e volontez.
48 « Med an hini ne anaveze ket e volontez, hag e-neus meritet kaoud taoliou, hennez ne bako nemed nebeud.
Goulennet e vo kalz digand an hini ez eus bet roet kalz dezañ ; goulennet e vo muioh digand an hini ez eus bet fiziet kalz ennañ ».
Lavared a ree Jezuz d’e ziskibien :
49 « Deuet on da zigas tan war an douar, ha pegement e karfen e vefe krog a-benn bremañ !
50 « Bez’ ez eus eur vadeziant hag am-eus da reseo, ha pegen enkrezet on beteg ma vo kaset kement-se da benn.
51 « Ha kavoud a ra deoh ez on deuet da lakaad ar peoh war an douar ? N’eo ket, a lavaran deoh, med kentoh an dizunvaniez. 52 Rag diwar-vremañ, en eun tiad a bemp dén e vo dizunvaniez etrezo : tri a-eneb daou, ha daou a-eneb tri ; 53 disparti a vo : an tad a-eneb e vab, ar mab a-eneb e dad, ar vamm a-eneb he merh, ar verh a-eneb he mamm ; ar vamm-gaer a-eneb he merh-kaer, ar verh-kaer a-eneb he mamm-gaer ».
54 Lavared a ree Jezuz d’an dud :
— « Pa welit eur goumoulenn o sevel diouz tu ar huz-heol, e lavarit kerkent : « Ema ar glao o tond », hag e ra glao neuze.
55 « Ha pa welit an avel o c’houeza diouz tu ar hreizteiz, e lavarit : « Tomm-bah e vo », ar péz a hoarvez.
56 « Sperejou faoz a zo ahanoh ! Gouest oh da anavezoud an amzer diouz doareou an douar hag an oabl. Hag an amzer a-vremañ, penaoz n’oh ket gouest da anavezoud anezi ?
57 « Ha perag ne vuzuliit ket ive, drezoh-c’hwi hoh-unan, ar péz a zo just ? 58 Evel-se, pa ’z ez gand da enebour da gaoud an dén a lezenn, klask an tu, en eur ober hent, d’en em gleved gantañ, gand aon na vefes sachet gantañ dirag ar barner, ha lakeet etre daouarn ar gward, ha taolet er prizon gand hemañ.
59 « Lavared a ran dit : Ne ’z i ket er mêz ahano, ken n’ez-po paeet beteg ar gwenneg diweza ».
1 En amzer-ze, e teuas eun nebeud tud da zigas kelou da Jezuz diwar-benn ar Halileaned lazet diwar urz Pilat, ha mesket o gwad gand hini o zakrifisou e oant o kinnig.
2 Respont a reas Jezuz dezo :
— « Ha kaoud a ra deoh e oa ar Halileaned-se brasoh peherien eged an oll dud all a Vro-Halilea, abalamour m’o-deus gouzañvet kement-se ? 3 Ne oant ket, a lavaran deoh. Ha ma ne droit ket ho kalon ouz Doue, ez eot oll da goll evelto.
4 « Hag an triweh a dud eo bet kouezet warno tour Siloe, hag a zo bet lazet : kavoud a ra deoh e oant kablusoh eged an oll dud all a zo o chom e Jeruzalem ? 5 Ne oant ket, a lavaran deoh. Ha ma ne droit ket ho kalon ouz Doue, ez eot oll da goll evelto.
6 Goude-ze, e lavaras Jezuz ar barabolenn-mañ :
— « Bez’ e-noa eun dén eur wezenn fiez plantet en e winieg. Dond a reas da glask frouez enni, ha ne gavas ket.
7 Hag e lavar da baotr ar winieg :
— « Abaoe tri bloaz, e teuan da glask frouez er wezenn fiez-mañ ha ne gavan ket. Troh anezi eta ; da ober petra derhel anezi da zuna an douar ? »
8 Med respont a reas egile :
— « Aotrou, laosk anezi bloaz c’hoaz ; amzer din da balad ha da lakaad teil en-dro dezi. 9 Ken buan all, e roio frouez hiviziken. Ma ne ro ket, e trohi anezi.
Attention, vous utilisez un navigateur peu sûr !