Accueil  -  Pevare sizunvez amzer Fask (B)

Pevare sizunvez amzer Fask (B)

Euz ar 25 a viz Ebrel d’ar 1a a viz Mae 2021

Pevare sul Fask

Yn 10, 11-18 (B)

Lavared a ree Jezuz d’ar Juzevien :

11 « Me eo ar pastor mad, ar mesaer gwirion, a ro e vuhez evid e zañvadezed.

12 « An hini a zo o labourad e koumanant n’eo ket ar pastor ; an dañvadezed n’int ket dezañ : ma wél ar bleiz o tond, e tilez an dañvadezed, hag e teh kuit. Skrapet e vezont gand ar bleiz, a ra dezo mond amañ hag ahont.

13 « N’eo ar mesaer-ze nemed eun dén o labourad e koumanant, ha n’eo ket chalet tamm e-béd gand an dañvadezed.

14 « Me eo ar pastor mad ; anavezoud a ran va dañvadezed, hag anavezet on ganto, 15 evel ma ’z on anavezet gand an Tad, ha ma’h anavezan-me an Tad. Ha va buhez a roan evid va dañvadezed.

16 « Dañvadezed all am-eus c’hoaz, ha n’emaint ket er hloz-mañ : ar re-ze ive e rañkan heñcha anezo. Selaou a raint va mouez : bez’ e vo eun tropell hepkén hag eur pastor hepkén ».

17 « Kared a ra an Tad ahanon, abalamour ma roan va buhez evid kemer anezi en-dro.

18 « Dén e-béd ne denn anezi diganin, med me eo a ro anezi ahanon va-unan. Galloud am-eus da rei anezi, ha galloud am-eus da gemer anezi en-dro. Kement-se zo bet gourhemennet din a-berz va Zad ».

Lun

Yn 10, 1-10

Komz a ree Jezuz evel-henn d’ar Farizianed :

1 — « E gwirionez, e gwirionez, e lavaran deoh : an hini ne d-a ket e kraou an deñved dre an nor, med a bign dre eul leh all, hennez zo eul laer hag eur skraper.

2 « An hini a ya dre an nor eo pastor an deñved. 3 Digeri a ra ar porzier dezañ, ha selaou a ra an deñved e vouez. An deñved a zo dezañ, a vez galvet gantañ pep hini dre e ano, hag e lak anezo da vond er-mêz. 4 P’e-neus kaset e oll deñved er-mêz, e kerz en o-raog, hag ez eont d’e heul, rag anavezoud a reont e vouez.

5 « Ne d-aint ket da heul eun dén diavêz, med tehed a raint pell dioutañ, rag ne anavezont ket mouez an dud diavêz ».

6 Setu ar barabolenn lavaret gand Jezuz d’ar Farizianed, med ne gomprenjont ket ar péz e-noa c’hoant lavared dezo.

7 Abalamour da-ze, e lavaras Jezuz dezo adarre :

— « E gwirionez, e gwirionez, e lavaran deoh : Me eo dor an deñved. 8 Laeron ha skraperien eo ar re oll a zo deuet em-raog ; med an deñved n’o-deus ket selaouet anezo.

9 « Bez’ ez on-me an nor : ma ’z eus unan o vond tre en eur dremen drezon-me, e vo salvet ; bez’ e hello mond ha dond, hag e kavo peuri. 10 Ne zeu al laer a-vad nemed evid laerez, laza ha distruja. Deuet on-me evid rei ar vuhez d’an deñved, ar vuhez e-leiz ».

Meurz

Yn 10, 22-30

22 Digouezoud a reas gouel Dedi an Templ, e Jeruzalem. Ar goañv e oa. 23 Mond ha dond a ree Jezuz en Templ, dindan porched Salomon. 24 En em voda a reas ar Juzevien en-dro dezañ, hag e lavarjont :

— « Beteg pe vare e laoski ahanom en arvar ? Ma ’z out-te ar Hrist, lavar deom frêz ».

25 Respont a reas Jezuz dezo :

— « Lavaret em-eus deoh, ha ne gredit ket. An oberou a ran-me en ano va Zad, setu ar péz a ro testeni din. 26  Med c’hwi, ne gredit ket ahanon peogwir n’oh ket euz va deñved. 27 Va deñved a zelaou va mouez ; anavezoud a ran-me anezo, hag e teuont d’am heul. 28 Rei a ran dezo ar vuhez peurbaduz : ne d-aint biken da goll, ha dén e-béd ne ziframmo anezo euz va dorn. 29 Va Zad,hag e-neus roet anezo din, zo brasoh eged an oll, ha dén ne hell diframma anezo euz dorn an Tad.

30 « An Tad ha me n’om nemed unan ».

Meher 28 a viz Ebrel
Sant Loiz-Mari Grignion a Vonfort, beleg
(Memor en Eskoptiou Kemper, Naoned, Roazon ha Sant-Brieg)

Yn 19, 25-27

25 En o zav, e kichenn kroaz Jezuz, e oa e vamm, ha c’hoar e vamm, Mari, gwreg Kleofaz, ha Mari-Madalen. 26 O weled evel-se e vamm, hag en he hichenn an diskib karet gantañ, e lavaras Jezuz d’e vamm :

— « Maouez, setu aze da vab ».

27 Goude-ze, e lavaras d’an diskib :

— « Setu aze da vamm ».

Hag adaleg an eur-ze, e kemeras an diskib anezi en e di.

Merher pevare sizunvez amzer Fask

Yn 12, 44-50

44 Sevel a reas Jezuz e vouez o lavared :

— « An hini a gréd ennon, n’eo ket ennon eo e kréd, med en Hini e-neus kaset ahanon ; 45 hag an hini a wél ahanon, a wél an Hini e-neus kaset ahanon.

46 « Me eo ar sklêrijenn : deuet on er béd evid ma ne jomo ket en deñvalijenn an hini a gréd ennon.

47 « Ma ’z eus unan bennag hag a glév va homzou, ha ne vir ket anezo, n’eo ket me eo a varno anezañ, rag n’on ket deuet evid barn ar béd, med evid salvi ar béd.

48 « An hini a zistaol ahanon ha na zigemer ket va homzou, e-neus e varner : ar Gomz am-eus lavaret. Ganti eo e vo barnet d’an deiz diweza. 49 Rag n’eo ket ahanon va-unan em-eus komzet : an Tad e-unan, hag e-neus kaset ahanon, e-neus kemennet din ar péz am-eus da lavared ha da gelenn ; 50 ha gouzoud a ran ez eo buhez peurbaduz gourhemenn an Tad. Kement a lavaran eta, e lavaran evel m’eo bet lavaret din gand an Tad ».

Yaou

Yn 13, 16-20

Goude beza gwalhet treid e ziskibien, e komzas Jezuz evel-henn :

16 « E gwirionez, e gwirionez, e lavaran deoh : n’eo ket ar zervicher brasoh eged e vestr, nag ar hannad brasoh eged an hini e-neus kaset anezañ.

17 « O houzoud kement-se, e vezot eüruz, ma reot evel-se.

18 « N’eo ket ahanoh oll eo e komzan. Bez’ e ouezan-me pe re am-eus dibabet, med red eo d’ar Skritur dond da wir : « An hini a zebre ar bara ganin e-neus savet e zeul a-eneb din ».

19 « Kement-se a lavaran deoh bremañ, a-raog ma tigouezo, evid ma kredot « Ez On-me », pa zigouezo.

20 « E gwirionez, e gwirionez, e lavaran deoh : piou bennag a zigemer an hini a gasan, a zigemer ahanon me va-unan ; hag an hini a zigemer ahanon, a zigemer an hini on bet kaset gantañ ».

Gwener

Yn 14, 1-6

D’an eur ma oa Jezuz o tremen euz ar béd-mañ d’e Dad, e lavare d’e ziskibien :

1 « Na laoskit ket ho kalon da veza strafuillet : kredi a rit e Doue, kredit ennon-me ive.

2 « E ti va Zad, ez eus meur a zemeurañs. Ma ne vije ket bet evel-se, daoust ha lavaret em-bije deoh : « Mond a ran da bourchas deoh eur plas » ? 3 Ha pa vin eet da bourchas deoh eur plas, e teuin en-dro da gemer ahanoh ganin, evid ma vezot, c’hwi ive, el leh m’emaon-me. 4 Evid mond d’al leh ma ’z an, eh anavezit an hent ».

5 Lavared a reas Tomaz dezañ :

— « Aotrou, n’ouzom ket da beleh emaout o vond. Penaoz e hellfem anavezoud an hent ? »

6 Respont a reas Jezuz dezañ :

— « Bez’ ez on-me an Hent, ar Wirionez hag ar Vuhez ; n’ez a dén d’an Tad, nemed drezon-me ».

Sadorn 1 mae
Dedi iliz-veur Sant Kaourintin
Gouel en eskopti Kemper ha Leon

Mz 16, 13-19

13 Deuet Jezuz e korn-bro Sezare-Filip, e houlennas ouz e ziskibien :

— « Piou eo Mab an dén, diouz ar péz a lavar an dud ? »

14 Respont a rejont :

— « Evid lod eo Yann-Vadezour, evid re all, Elïaz, evid re all c’hoaz, Jeremïaz pe unan euz ar brofeted ».

15–« Ha c’hwi, emezañ dezo, petra a lavarit ? Evidoh, piou ez on-me ? »

16 Neuze, e respontas Simon-Pér en eur lavared :

— « Te eo ar Hrist, Mab an Doue beo-buezeg ! »

17 Respont a reas Jezuz gand ar homzou-mañ :

— « Eüruz out, Simon, mab da Yonaz, rag n’eo ket ar horv nag ar gwad eo o-deus roet dit da anaoud an dra-ze, med va Zad hag a zo en neñv. 18 Ha me a lavar dit : te zo roh, ha war ar roh-ze e savin va Iliz, ha ne vo ket galloud ar Maro treh dezi. 19 Rei a rin dit alhweziou Rouantèlèz an Neñv : kement az-po liammet war an douar, a vo liammet en neñv, ha kement az-po diliammet war an douar, a vo diliammet en neñv ».