Euz an 12 d’an 18 a viz Gwengolo 2021
27 Mond a reas Jezuz, e ziskibien asamblez gantañ, etrezeg ar hêriadennou tostig-tost da Zezare-Filip. En hent, e reas ar goulenn-mañ ouz e ziskibien :
— « Hervez an dud, piou on-me ? »
28 Respont a rejont dezañ :
— « Yann-Vadezour ; evid lod all, Eliaz ; evid lod all c’hoaz, unan euz ar brofeted ».
29 Hag e houlennas outo :
–- « Ha c’hwi, petra a lavarit ? Evidoh-c’hwi, piou ez on-me ? »
Lavared a reas Pèr dezañ :
— « Ar Hrist ez out-te ! »
30 Neuze e roas urz dezo chom hep komz da zén diwar e benn.
31 Neuze e stagas da gelenn dezo e rañke Mab an Dén gouzañv kalz, beza dianzavet gand ar Re-Goz, ar Veleien-Vraz hag ar Skribed, beza kaset d’ar maro, ha tri devez goude, adsevel da veo.
32 Ha frêz e lavare kement-se dezo. Neuze, e tennas Pèr anezañ a-gostez, hag e stagas da ober rebechou taer dezañ.
33 Med distrei a reas Jezuz, hag o weled e ziskibien, e hourdrouzas Pèr, en eur lavared :
— « Kee a-dreñv-din, Satan, rag n’ema ket skiant Doue ganit, skiant an dud ne lavaran ket ».
34 Goude-ze e halvas Jezuz an dud hag e ziskibien da zond d’e gaoud, hag e lavaras dezo :
— « M’e-neus c’hoant unan bennag dond war va lerh, dezañ trei kein dezañ e-unan, kemer e groaz ha dond d’am heul. 35 Rag an neb a fell dezañ savetei e vuhez, a gollo anezi ; med an neb a gollo e vuhez abalamour din ha d’an Aviel, a zaveteio anezi ».
1 Echu e brezegenn dirag an dud, ez eas Jezuz e Kêr Gafarnaom.
2 Eun ofiser e-noa eur zervicher hag a oa klañv ha dare da vervel ; kared kenañ a ree anezañ avad.
3 Klevet gantañ ano euz Jezuz, e kasas an ofiser eun nebeud euz pennou-braz ar Juzevien d’e gaoud, evid pedi anezañ da zond da zavetei e zervicher.
4 Digouezet e-kichenn Jezuz, eh aspedjont anezañ stard en eur lavared : « Meritoud a ra e rafes kement-se evitañ, 5 rag kared a ra or pobl : gantañ eo bet lakeet sevel deom ar zinagogenn ».
6 Ober a ree Jezuz hent ganto, ha dija ne oa ket pell ken diouz an ti, pa zeuas mignoned d’an ofiser da lavared dezañ euz e berz :
— « Aotrou, arabad dit kemer ar boan-ze, rag n’on ket dîn e teufes dindan va zoenn. 7 Abalamour da ze, n’em-eus ket kredet me va-unan mond beteg ennout, med lavar eur gér, ha ra vo pare va zervicher ! 8 Bez’ ez on-me dindan galloud unan all, med soudarded am-eus dindannon ; pa lavaran da unan : Kee ! ez a, da unan all : Deus ! e teu, ha d’am zervicher : Gra an dra-mañ ! hag e vez greet gantañ ».
9 O kleved kement-se, e oe estlammet Jezuz. Trei a reas war-zu an dud a oa ouz e heul :
— « Lavared a ran deoh, eme Jezuz : en Izrael zokén n’em-eus ket kavet ken braz feiz ».
10 Pa zistroas ar gannaded d’an ti, e kavjont ar zervicher yah-pesk.
13 « Dén n’eo savet d’an Neñv, nemed an hini a zo diskennet euz an Neñv, Mab an Dén.
14 « Evel ma oe savet en uhel an naer arem gand Moïzez, en dezert, evel-se ive e rañko Mab an Dén beza savet en uhel, 15 evid m’e-no drezañ ar vuhez peurbaduz kement hini a gréd ennañ.
16 « Ken braz eo bet karantez Doue evid ar béd, m’e-neus roet e Vab unganet evid n’ez aio ket da goll kement hini a gred ennañ, med evid m’e-no ar vuhez peurbaduz.
17 « Rag Doue e-neus kaset e Vab er béd, n’eo ket evid barn ar béd, med evid ma vo salvet ar béd drezañ ».
25 E kichenn kroaz Jezuz, e oa e vamm, ha c’hoar e vamm, Mari, gwrég Kleofaz, ha Mari-Madalen.
26 O weled e vamm, hag en he hichenn an diskib karet gantañ, e lavaras Jezuz dezi :
— « Maouez, setu amañ da vab ».
27 Goude-ze, e lavaras d’an diskib :
— « Setu amañ da vamm ».
Hag diwar an eur-ze, e kemeras an diskib anezi en e di.
33 Souezet e oa e dad hag e vamm, gand kement a glevent diwar e benn. 34 Rei a reas Simeon e vennoz dezo, hag e lavaras da Vari, e vamm :
— « Setu m’ema ar hrouadur-mañ o kas da goll hag o kas da veza salvet kalz a dud en Izrael ; bez’ e vo eur zîn, hag a lakaio enebiez da zevel war e goust, 35 ken na vo da galon dit-te treuzet gand eur hleze. Evel-se, e vo diskuliet ar zoñjou kuzet e kalon eur halz a dud ».
36 Pedet e oa bet Jezuz gand eur Farizian da zrebi gantañ. Mond a reas d’e di, hag Eñ ouz taol.
37 Ha setu ma tigouezas eur vaouez euz kêr, eur beherez anezi. Klevet he-doa e oa Jezuz ouz taol e ti ar Farizian. Deuet e oa ganti eur podad alabastr leun a louzou-c’hwez-vad.
38 Dour e-leiz ganti en he daoulagad, e chome a-dreñv da Jezuz, e-harz e-dreid. Hag e teuas he daelou da goueza war dreid Jezuz. Seha a ree anezo gand he bleo, ha rei pokou dezo, ha skuilla warno louzou-c’hwez-vad.
39 O weled kement-se, e lavare ennañ e-unan ar Farizian e-noa pedet Jezuz :
« Ma vije bet hemañ eur profet, e-nije gouezet piou ha peseurt maouez eo an hini a zo o touch outañ : eur behéréz ! »
40 Neuze, e lavaras Jezuz :
— « Simon, eun dra bennag am-eus da lavared dit ».
— « Lavar, Mestr », emezañ.
Ha neuze Jezuz :
41 « Bez’ e-noa eur prester-arhant daou zleour : unan a oa dleour dezañ a bemp kant diner, egile a hanter-kant. 42 O veza ne hellent ket paea o dle, e roas diskarg d’an eil ha d’egile euz kement a zleent. 43 Pehini anezo a garo anezañ ar muia ? »
Respont a reas Simon :
« An hini, moarvad, e-neus bet ar brasa diskarg ».
— « Gwir a lavarez », eme Jezuz.
44 Trei a reas neuze war-zu ar vaouez en eur lavared da Zimon :
— « Gweled a rez ar vaouez-se. Deuet on en da di, ha n’az-peus ket skuillet dour war va zreid ; hi he-deus glepiet anezo gand he daelou, ha sehet anezo gand he bleo.
45 « N’az-peus ket poket din ; hi, abaoe m’eo deuet en ti, n’he-deus ket ehanet da rei pokou d’am zreid.
46 « N’az-peus ket skuillet louzou-c’hwez-vad war va fenn ; hi a-vad, he-deus skuillet war va zreid louzou-c’hwez-vad a briz braz.
47 « Abalamour da ze, e lavaran dit : pardonet eo dezi he fehejou, he fehejou ken stank, en abeg m’he-deus diskouezet kalz karantez. Med an hini a vez pardonet nebeud dezañ, a gar nebeud ».
48 Ha neuze d’ar vaouez :
— « Pardonet eo dit da behejou ».
49 Lavared a reas enno o-unan ar re a oa bet pedet : « Piou eo an dén-mañ, hag a ya beteg pardoni ar pehejou zokén ? »
50 Jezuz neuze d’ar vaouez :
— « Saveteet out bet gand da feiz. Kerz e peoh ».
1 C’hoarvezoud a reas gand Jezuz tremen a-dreuz kêriou ha bourhadennou, o prezeg hag oh embann Kelou-Mad Rouantèlèz Doue. Ouz e heul e oa an Daouzeg, 2 hag ive eun nebeud merhed, bet pareet gantañ diouz droug-sperejou ha kleñvejou : Mari, anvet Madalen, kaset kuit seiz diaoul diouti, 3 Janed, gwreg Kouza, merour Herodez, Suzanna ha meur a hini all a zikoure anezo diwar o madou.
4 Dond a ree tud euz pep kêr war-zu Jezuz, hag o veza ma oa e-leiz anezo bodet en-dro dezañ, e lavaras ar barabolenn-mañ :
5 — « Eet e oa an hader da hada e had, ha dre ma ’z ee o hada, e kouezas euz ar greun war bord an hent. Breset e oent gand an treid, ha debret gand laboused an Neñv.
6 « Koueza a reas eul lodenn all war ar vein ; diwan a rejont ha dizeha dre ziouer a hlebor.
7 « Koueza a reas eul lodenn all c’hoaz e-touez an dréz, hag e oent mouget gand an dréz o kreski d’o heul.
8 « Koueza a reas ive lod euz ar greun en douar mad ; sevel a rejont ha teuler frouez : kant evid unan.
Ha Jezuz neuze, a vouez kreñv :
— « An neb e-neus diskouarn da gleved, ra glevo ! ».
9 Goulenn a reas e ziskibien outañ petra a oa da intent gand ar barabolenn-ze. 10 Respont a reas dezo :
— « Deoh-c’hwi eo roet da anaoud misteriou Rouantèlèz Doue ; d’ar re all a-vad eo dre barabolennou hepken. Evel-se : Selled a reont hep gweled, kleved a reont heb intent.
11 « Setu petra a dalvez ar barabolenn : an had eo Komz Doue.
12 « Bez’ ez eus lod tud hag a zo war bord an hent : ar re-ze o-deus klevet ; neuze e teu an diaoul, hag e lam kuit ar Gomz euz o halonou, gand aon na zeufent da gredi ha da veza salvet.
13 « Bez’ ez eus lod hag a zo war ar vein : pa glevont, e tigemeront ar Gomz gand levenez. Med n’o-deus ket a wriziou ; e-pad eur pennad amzer e kredont, med da vare an trubuillou, e troont kein d’ar feiz.
14 « Ar péz a zo kouezet e-mesk an dréz eo ar re a glèv, med diwar goust an trubuillou, ar binvidigez ha plijaduriou ar vuhez, e vezont mouget en hent ha ne zeuont ket da zarevi ».
15 « Hag ar péz a zo kouezet en douar mad eo ar re o-deus klevet ar Gomz gand eur galon eün ha mad, a vir anezi, hag a daol frouez en eur zerhel stard ».
Attention, vous utilisez un navigateur peu sûr !