Accueil  -  Pevarzegved sizunvez war ar bloaz (B)

Pevarzegved sizunvez war ar bloaz (B)

Euz ar 4 d’an 10 a viz Gouere 2021

Pevarzegved sul war ar bloaz

Mk 6, 1-6 (B)

1 Dond a reas Jezuz d’e vamm-vro, Nazared, e ziskibien ouz e heul.

2 Da geñver deiz ar zabat, ez eas da gelenn er zinagogenn. O kleved anezañ, e chome bamet kalz a dud, hag e lavarent :

— « Euz peleh e teu dezañ kement-se ? Pebez furnez a zo bet roet dezañ ! Ha nag a vurzudou a hoarvez dre e zaouarn !

3 Daoust ha n’eo ket hemañ ar halvez, mab Mari, breur da Jakez, da Jozef, da Jud ha da Zimon ? Daoust ha n’ema ket ive e hoarezed, amañ, en on-touez ? » Hag e oent feuket diwar e benn.

4 Ha Jezuz o lavared dezo :

— « Ne vez disprizet eur profet nemed en e vro, en e gerentiez hag en e famill ».

5 Ha ne oa ket evid ober eno burzud e-béd. Koulskoude, e roas ar pare d’eun nebeud tud klañv, en eur astenn e zaouarn warno. 6 Souezet e chome gand o diouer a feiz.

Neuze, e tremene Jezuz dre ar hêriadennou tro-war-dro, en eur rei e gelennadurez.

Lun

Mz 9, 18-26

18 E keit ha ma oa Jezuz o komz ouz diskibien Yann-Vadezour, e tosteas outañ eun dén a reñk uhel, hag en eur stoui dirazañ, e lavaras dezañ :

— « Ema va merh o paouez mervel, med deus da astenn da zorn warni hag e vevo ».

19 Sevel a reas Jezuz ha mond d’e heul, e ziskibien asamblez gantañ.

20 Ha setu eur vaouez, klañv gand ar holl-gwad abaoe daouzeg vloaz, a dosteas a-dreñv dezañ, hag a douchas ouz bevenn e vantell. 21 Rag lavared a ree enni he-unan : Ma teuan a-benn, netra nemed da douch ouz e vantell, e vezin saveteet.

22 Med Jezuz o tistrei hag o weled anezi, a lavaras :

— « Bez fiziañs, va merh, saveteet out bet gand da feiz ».

Ha kerkent e oe saveteet ar vaouez.

23 Pa zigouezas Jezuz e ti an dén a reñk uhel, o weled ar fleüterien hag an dud, difred ganto, e lavaras dezo :

24— « It er-mêz ! N’eo ket maro ar plahig ; kousket eo ».

Hag e reent goap anezañ. 25 Pa oe lakeet an dud er-mêz, ez eas tre en ti. Kregi a reas e dorn ar plahig, hag e savas houmañ en he zav.

26 Dre an takad a-béz, e redas ar vrud a gement-se.

Meurz

Mz 9, 32-38

32 Digaset e oe da Jezuz eun dén dalhet gand an droug-spered hag a oa mud. 33 Eur wech kaset kuit an droug-spered, e stagas an hini mud da gaozeal. Estlammet e oe an dud, hag e lavarent :

— « Biskoaz n’eus bet gwelet kemend-all en Izrael ! ».

34 Lavared a ree ar Farizianed avad :

— « Dre briñs an droug-sperejou eo e kas kuit an droug-sperejou ».

35 Mond a ree Jezuz dre an oll gêriou ha kêriadennou, en eur gelenn en o zinagogennou. Embann a ree Kelou Mad ar Rouantèlèz. Parea a ree pep kleñved ha pep langis.

36 O weled kement-se a dud a oa dirazañ, e-noe Jezuz truez outo, rag skuiz ha fallgalonet e oant, evel deñved hep pastor.

37 Neuze, e lavaras d’e ziskibien :

— « Braz eo an eost. An eosterien a-vad a zo nebeud anezo. 38 Pedit eta mestr an eost, ma kaso eosterien d’e bark ».

Merher

Mz 10, 1-7

1 Gelver a reas Jezuz e zaouzeg diskib, hag e roas dezo galloud war an droug-sperejou evid kas anezo kuit, ha rei ar pare euz n’eus forz peseurt kleñved pe zempladurez.

2 Setu amañ anoiou an daouzeg abostol : ar henta, Simon, anvet Pèr, hag Andre e vreur, Jakez mab Zebede, hag e vreur Yann, 3 Filip ha Berteleme, Tomaz ha Maze ar publikan, Jakez mab Alfe ha Tade, 4 Simon ar Greduz ha Judaz Iskariot, an hini end-eeün a werzas Jezuz.

5 Kas a reas Jezuz an daouzeg-se en hent en eur rei dezo ar gourhemennou-mañ :

– « Arabad deoh mond gand an hentchou a gas war-zu ar bayaned, ha chomit hep mond e kêriou ar Zamaritaned. 6 It kentoh war-zu an deñved dianket euz pobl Izrael. 7 Dre ma’z eot gand ho hent, embannit eo tostig-tost Rouantèlèz Doue ».

Yaou

Mz 10, 7-15

Lavared a ree Jezuz d’an daouzeg abostol :

7 « Dre ma ’z eot gand ho hent, roit da anaoud eo tostig Rouantèlèz Doue. 8 Roit ar pare d’ar re glañv, roit ar vuhez en-dro d’ar re varo, glannait an dud lor, kasit kuit an droug-sperejou. Resevet ho-peus evid netra, roit evid netra.

9 « Na gasit ganeoh nag aour nag arhant, na moneiz en ho kouriz, 10 na sah evid an hent, na diou vantell, na boutou, na baz, rag ar micherour eo dleet dezañ e voued.

11 « Kement kêr ha kement kêriadenn ma ’z eot enno, goulennit piou a zo dîn da zigemer ahanoh, ha chomit eno beteg ma ’z eot kuit.

12 « En eur vond tre en ti, saludit an dud a zo o chom ennañ. 13 Mar d-eo dîn an ti-ze, ra ziskenno ho peoh warnañ. Ma n’eo ket dîn avad, ra zistroio ho peoh warnoh ».

14 « Ma ne ’fell ket d’an dud digemered ahanoh, na selaou ho komzou, it er-mêz euz an ti-ze, pe euz ar gêr-ze, en eur heja ar boultrenn euz ho treid. 15 E gwirionez, e lavaran deoh, ne vezor ket ken rust, da zeiz ar Varn, e-keñver bro-Sodom ha Gomor, hag e-keñver ar gêr-ze ».

Gwener

Mz 10, 16-23

Lavared a ree Jezuz d’an daouzeg abostol :

16 « Setu ma kasan ahanoh evel deñved e-touez bleizi. Bezit eta war evez braz evel naered, ha didroidell a galon evel koulmed.

17 « Diwallit diouz an dud ! kas a raint ahanoh dirag al lezvarn, skourjeza a raint ahanoh en o zinagogennou. 18 Kaset e vezot dirag ar gouarnourien hag ar rouaned, abalamour din. Eun testeni e vo kement-se evito, hag evid ar bayaned.

19 « Pa vezot evel-se lakeet etre o daouarn, na vezit ket nehet o klask petra pe benaoz lavared. Roet e vezo deoh da houzoud ar péz ho-po da lavared d’ar mare-ze. 20 Ha n’eo ket c’hwi eo a gomzo, med Spered ho Tad eo a vo o komz ennoh.

21 « Kas e vreur a raio ar breur evid beza lakeet d’ar maro, hag an tad, e grouadur, sevel a raio ar vugale a-eneb o zud, ha kas anezo d’ar maro.

22 « Kasoni o-do an oll ouzoh abalamour d’am ano ; an hini avad, a zalho beteg penn, hennez a vo saveteet.

23 « Ma vez klasket war ho lerh e kêr pe gêr, tehit d’eur gêr all. E gwirionez, e lavaran deoh, n’ho-pezo ket greet tro kêriou Izrael, a-raog distro Mab an Dén ».

Sadorn

Mz 10, 24-33

Lavared a ree Jezuz d’an daouzeg abostol :

24 « N’eo ket an diskib uhelloh eged e vestr, nag ar zervicher uhelloh eged e aotrou. 25 Tra-walh eo d’an diskib beza par d’e vestr, ha d’ar zervicher beza par d’e aotrou. M’o-deus an dud greet Beelzeboul euz ar penn-tiègèz, petra ne lavarint ket euz e dud ?

26 « Arabad kaoud aon rag an dud-se ; n’eus netra goloet ha na zeufe ket da veza dizoloet, netra kuzet ha na zeufe ket da veza anavezet.

27 « Kement a lavaran deoh en deñvalijenn, lavarit anezañ er sklêrijenn ; kement a glevit e plég ho skouarn, embannit anezañ diwar an toennou.

28 « Arabad kaoud aon rag ar re a laz ar horv, ha ne hellont ket laza an ene. Ho-pet aon kentoh ouz an hini a hell kas da goll ar horv koulz hag an ene er jehen.

29 « Daoust ha ne vez ket gwerzet daou filip evid eur gwenneg ? Koulskoude, ne gouez hini anezo war an douar, heb asant ho Tad.

30 « Ha c’hwi, kontet eo kement blevenn a zo war ho penn.31 Bezit dienkrez eta ; talvezoud a rit muioh eged oll filiped an neñv.

32 « Kement hini a zisklêrio dirag an dud beza a-du ganin, a vo disklêriet ganin-me ive dirag va Zad a zo en Neñv, beza a-du gantañ. 33 Med kement hini am naho dirag an dud, a vo nahet ganin-me ive dirag va Zad a zo en Neñv ».