Euz an 20 d’ar 26 a viz C’hwevrer 2022
Lavared a ree Jezuz d’an dud :
27 « Deoh-c’hwi hag a zo o selaou ahanon, e lavaran : Karit hoh enebourien, grit vad d’ar re o-deus kasoni ouzoh.
28 « Goulennit bennoz Doue war ar re a daol malloz warnoh ; pedit evid ar re a damall ahanoh e-gaou.
29 « D’an hini a sko ganit war eur jod, astenn ive ebén dezañ. An hini a lam diganit da vantell, laosk anezañ da baka ive da dunikenn.
30 « Ro d’an néb a houlenn eun dra bennag diganit, ha d’an néb a lam diganit ar péz a zo dit, chom hep goulenn digantañ.
31 « Evel m’ho-peus c’hoant e rafe an dud deoh, grit dezo evel-se ive.
32 « Ma karit ar re a gar ahanoh, peseurt grad a zo dleet deoh ? Ar beherien zokén a gar ar re a gar anezo.
33 « Ma rit vad d’ar re a ra vad deoh, peseurt anaoudegez vad a zo dleet deoh ? Ar beherien zokén a ra kemend-all.
34 « Ma prestit arhant d’ar re a zoñj deoh ho-po anezañ en-dro, peseurt anaoudegez vad a zo dleet deoh ? Ar beherien zokén a brést d’ar beherien evid ma vo restaolet dezo kemend-all.
35 « Er hontrol, karit hoh enebourien, grit vad ha prestit hep gortoz netra en-dro. Neuze e vo braz ho tigoll, hag e vezot bugale d’an Uhel-Meurbed, rag madelezuz eo Eñ ouz an dud dianaoudeg ha droug.
36 « Bezit trugarezuz evel m’eo trugarezuz ho Tad.
37 « Na varnit ket, ha ne vezot ket barnet.
« Na gondaonit ket, ha ne vezot ket kondaonet.
« Pardonit, hag e vo pardonet deoh.
38 « Roit, hag e vo roet deoh : eur muzuliad réz ar bord, stardet, hejet, leun-barr a vo skuillet deoh en ho tavañjer ; rag diouz ar muzul a root gantañ evid ar re all, e vo muzuliet deoh d’ho tro.
14 O tond gand Pèr, Jakez ha Yann war-zu an diskibien all, e welas Jezuz tud e-leiz en-dro dezo, ha skribed o terhel kaoz ganto. 15 Kerkent ha ma weljont Jezuz, e oent oll sebezet, hag e teuent d’ar réd da zaludi anezañ.
16 Goulenn a reas Jezuz outo :
— « Euz petra zo kaoz ganeoh ? ».
17 Respont a reas dezañ eun dén euz a-douez an dud :
— « Mestr, digaset em-eus dit va mab hag a zo dalhet gand eur spered a laka anezañ da veza mud. 18 Kregi a ra ar spered-se ennañ n’eus forz e peleh, stlepel a ra anezañ d’an douar, dond a ra eonenn e genou ar paotr, skrignal a ra e zent, hag e teu e gorv da veza reud. Goulennet em-eus digand da ziskibien kas ar spered-se kuit, med n’int ket deuet da benn ».
19 Lavared a reas Jezuz dezo :
— « Tud diskredig hag a zo ahanoh ! Pegeid e vezin-me ganeoh ? Pegeid e rañkin gouzañv ahanoh ? Digasit anezañ din ».
20 Digaset e oe dezañ. Kerkent ha ma welas Jezuz, e stagas ar spered da heja ar paotr en eur doare rust. Koueza a reas d’an douar, hag e ruille, eonenn gantañ en e henou.
21 Goulenn a reas Jezuz ouz an tad :
— « Pegeid zo e c’hoarvez kement-se gantañ ? »
— « Abaoe e vugaleaj, emezañ. 22 Hag aliez eo bet stlapet en tan pe en dour gand ar spered, evid ober dezañ mervel. Med ma hellez ober eun dra bennag, deus d’or zikour, dre druez ouzom ! ».
23 Ha Jezuz dezañ :
– « Mar gellez » emezout…? Evid an hini a gréd, e hell pep tra en em gaoud ».
24 Kerkent e youhas tad ar paotr :
— « Kredi a ran ! Deus war zikour, gand al laosk m’eo va feiz ».
25 O weled e oa an dud o tiredeg, e hourdrouzas Jezuz ar spered hudur en eur lavared dezañ :
— « Spered a lak an dud da veza mud ha bouzar, gourhemenn a ran dit : kee kuit euz ar paotr-mañ, ha na zistro biken ennañ ».
26 Youhal a reas ar spered, heja ar paotr en eun doare rust, hag ez eas er-mêz anezañ. Dond a reas hemañ da veza evel unan maro, ken ma lavare an oll dud : « Maro eo ! ».
27 Med en eur gregi en e zorn, e reas Jezuz dezañ sevel : chom a reas ar paotr en e-zav. 28 Pa oe eet Jezuz tre en ti, e houlennas e ziskibien outañ, en o fart o-unan :
— « Perag n’on-eus ket ni gellet kas kuit ar spered-se ? »
29 Respont a reas Jezuz dezo :
— « Ne hell ket eur seurt spered beza kaset kuit, nemed dre ar bedenn hag ar yun ».
13 Deuet e oa Jezuz e korn-bro Sezare-Filip, hag e houlennas ouz e ziskibien :
— « Piou eo Mab an dén, hervez lavar an dud ? »
14 Respont a rejont :
— « Evid lod eo Yann-Vadezour, evid re all, Eliaz, evid re all c’hoaz, Jeremiaz pe unan euz ar brofeted ».
15 Lavared a reas Jezuz dezo :
– « Ha c’hwi, petra a lavarit ? Evidoh, piou ez on-me ? »
16 Respont a reas Simon-Pèr o lavared :
— « Te eo ar Hrist, Mab an Doue beo ! »
17 Respont a reas Jezuz o lavared dezañ :
— « Eüruz out, Simon, mab Yonaz, rag n’eo ket ar hig nag ar gwad eo o-deus roet dit da anaoud an dra-ze, med va Zad hag a zo en neñv. 18 Ha me a lavar dit : Te zo roh, ha war ar roh-se e savin va Iliz, ha ne vo biken galloudegeziou ar Maro treh dezi. 19 Dit e roin alhweziou Rouantèlèz an Neñv : kement az-po liammet war an douar, a vo liammet en neñv, ha kement az-po diliammet war an douar, a vo diliammet en neñv ».
38 Lavared a ree Yann, unan euz an Daouzeg, da Jezuz :
— « Mestr, gwelet on-eus eun dén o kas kuit an droug-sperejou en da ano ; harzet on-eus outañ, rag n’ema ket gand ar re a zo a-du ganeom ».
39 Respont a reas Jezuz :
— « Arabad herzel outañ, rag an hini a ra eur burzud en va ano, ne hell ket lavared droug ouzin kerkent war-lerh. 40 An hini n’ema ket a-eneb deom, a zo a-du ganeom ».
Lavared a ree Jezuz d’e ziskibien :
41 « Piou bennag a roio deoh da eva eur werennad dour, ablamour ma ’z oh diskibien d’ar Hrist, e gwirionez e lavaran deoh, ne gollo ket e rekompañs ».
42 « An hini a lak da behi unan bennag euz ar re vihan-mañ a gréd ennon, e vefe gwelloh staga ouz e houzoug eur mên-milin a vez lakeet da drei gand an azened, ha stlapa anezañ er mor.
43 « Ha ma vez da zorn o tougenn ahanout d’ar pehed, troh anezañ, rag gwelloh eo dit antreal mogn er vuhez peurbaduz, kentoh eged koueza gand da zaou zorn er « jehenn », en tan na varv ket.
(44)45 Ma vez da droad o tougenn ahanout d’ar pehed, troh anezañ, rag gwelloh eo dit mond kamm d’ar vuhez peurbaduz, eged beza stlapet gand da zaou droad er « jehenn ».
(46)47 « Ha ma vez da lagad o tougenn ahanout d’ar pehed, tenn anezañ kuit, rag gwelloh eo dit mond born e Rouantèlèz Doue, eged beza stlapet gand da zaou lagad er « jehenn », 48 el leh m’ema ar preñved na varvont ket hag an tan na zeu ket da vouga. 49 Rag pep dén vo sallet en tan.
50 « Eun dra vad eo an holen ; med ma teu an holen da goll e vlaz, gand petra e vo roet dezañ e zaour en-dro ? Ra vezo holen ganeoh-c’hwi, ha bezit er peoh kenetrezoh ».
1 Degouezoud a ra Jezuz e Bro-Judea, ha goude-ze en tu all d’ar Jordan. Adarre, e teu e-leiz a dud en-dro dezañ, hag adarre, evel kustum, e kelenne anezo.
2 Tostaad a reas Farizianed outañ, hag evid paka anezañ en e gomzou, e houlennjont outañ :
— « Daoust hag aotreet eo eur gwaz da gas e wrég kuit ? »
3 Respont a reas Jezuz dezo :
— « Petra zo bet gourhemennet deoh gand Moïzez ? »
4 Lavared a rejont dezañ :
– « Aotreet e-neus Moizez da gas ar wrég kuit, gand ma vo savet eul lizer a zisparti ».
5 Respont a reas Jezuz dezo :
— « Abalamour ma z’ eo kaled ho kalon eo eo bet skrivet al lezenn-ze gand Moïzez evidoh. 6 Med e penn kenta ar béd, e-noa Doue greet anezo gwaz ha maouez. 7 Rag-se, e kuitaio ar gwaz e dad hag e vamm, hag en em stago ouz e wrég, 8 ha ne vint o-daou nemed unan ; evel-se, n’eus ket mui daou anezo, med unan hepkén.
9 « Arabad d’an dén eta dispartia ar péz a zo bet unanet gand Doue ! »
10 Eur wech deuet en ti, e ree an diskibien goulennou outañ adarre war ar poent-se. 11 Hag e respontas dezo :
— Kement hini a gas kuit e wrég hag a gemer unan all, a ra avoultriez en he-heñver. 12 Hag ar vaouez he-deus kaset kuit he gwaz, evid kemer unan all, a ra avoultriez ».
13 Digaset e oa bugaligou da Jezuz, dezañ da astenn e zaouarn warno. Med kaset e oent pelloh buan gand an diskibien.
14 O weled kement-se, ez eas Jezuz droug ennañ, hag e lavaras :
— « Laoskit ar vugaligou da zond d’am haoud ; na virit ket outo, rag d’ar re a zo heñvel outo eo Rouantèlèz Doue. 15 E gwirionez, e lavaran deoh : an hini na zigemer ket Rouantèlèz Doue evel ma ra eur bugelig, ne z’ aio ket enni ».
16 Stardet e vezent gantañ etre e zivreh, hag e vennige anezo en eur astenn e zaouarn warno.
Attention, vous utilisez un navigateur peu sûr !