C’hwezegved sizunvez war ar bloaz (C)

Euz ar 20 d’ar 26 a viz Gouere 2025

C’hwezegved sul war ar bloaz (C)

Lk 10, 38-42

³⁸ E-pad ma oa Jezuz hag e ziskibien oh ober hent, e tigouezas dezañ mond en eur gêriadenn, hag e oe digemeret gand eur vaouez, Marta heh ano, en he zi.

³⁹ Bez’ he-doa houmañ eur hoar, Mari heh ano : azezet e oa e-harz treid Jezuz, evid selaou e gomzou, ⁴⁰ e-keid ha ma oa Marta oh ober war-dro an ti, prés warni e-leiz. Chom a reas a-zav, hag e lavaras :

— « Aotrou, ha n’out ket nehet o weled va hoar o lezel ahanon va-unan da ober ar zervich ? Lavar dezi ’ta, dond da zikour ahanon ».

⁴¹ Med, respont a reas an Aotrou dezi :

— « Marta ! Marta ! nehet out ha tregaset gand eur bern traou. Unan hepkén a zo ezomm anezañ. ⁴² Dibabet he-deus Mari al lodenn wella, ha ne vo ket lamet diganti ».

Lun

Mz 12, 38-42

³⁸ Lavared a reas lod euz ar skribed hag euz ar Farizianed da Jezuz :

— « Mestr, ni a garfe gweled eur zîn euz da berz ».

³⁹ Respont a reas dezo :

— « Eur zîn a houlenn ar rummad droug hag avoultrer-mañ ; med sîn all e-béd ne vo roet dezañ, nemed sîn ar profet Jonaz. ⁴⁰ « Rag, evel m’eo chomet Jonaz e kov ar pésk braz e-pad tri devez ha teir nozvez, evel-se e chomo Mab an Dén e korv an douar e-pad tri devez ha teir nozvez.

⁴¹ « Da zeiz ar varn, e savo tud Niniv war eun dro gand tud ar rummad-mañ, hag e kondaono anezo, rag troet o-deus o halon ouz Doue diwar prezegennou Jonaz, ha setu ma ’z eus amañ muioh eged Jonaz.

⁴² « Da zeiz ar varn, e savo rouanez ar Hreisteiz war eun dro gand tud ar rummad-mañ, hag e kondaono anezo, rag deuet eo euz penn pella an douar da zelaou furnez Salomon, ha setu ma ’z eus amañ muioh eged Salomon ».

Meurz 22 a viz Gouere
Gouel Santez Mari-Madalen

Yn 20, 1.11-18

Goude maro Jezuz, ¹ d’an deiz kenta euz ar zizun, da houlou-deiz, pa oa teñval c’hoaz, ez a Mari-Madalen d’ar béz, hag e wél ar mên lamet kuit diwar ar béz.

¹¹ Bez’ e oa en he zav er mêz, e-kichenn ar béz, hag e oa o ouela. E sèr gouela, e soublas war-zu ar béz. ¹² Gweled a ra daou Êl, gwisket e gwenn, azezet el leh ma oa bet astennet korv Jezuz, unan ouz ar penn hag egile ouz an treid.

Lavared a reont dezi :

¹³ — « Maouez, perag emaout o ouela ? »

Respont a ra dezo :

— « Kaset o-deus kuit va Aotrou, ha ne ouezan ket e-peleh eo bet lakeet ».

¹⁴ En eur gomz evel-se, e troas war-dreñv, hag e wélas Jezuz a oa eno, med ne ouie ket e oa Jezuz.

¹⁵ Lavared a ra Jezuz dezi :

— « Maouez, perag emaout o ouela ? Piou emaout o klask ? »

O veza ma kave dezi e oa al liorzour, e lavaras dezañ :

— « M’az-peus-te kaset anezañ ganit, lavar din e-peleh az-peus lakeet anezañ, hag ez in-me da gerhad anezañ ».

¹⁶ Lavared a ra Jezuz dezi :

— « Mariam ! »

Distrei a ra-hi ha lavared en hebreeg :

— « Rabbouni ! » da lavared eo : « Mestr ».

¹⁷ Lavared a ra Jezuz dezi :

— « Arabad dit derhel krog ennon, rag n’on ket savet c’hoaz etrezeg va Zad. Kee da gaoud va breudeur, ha lavar dezo : « Sevel a ran etrezeg va Zad hag ho Tad, etrezeg va Doue hag ho Toue ».

¹⁸ Mond a ra Mari-Madalen eta da rei da houzoud d’an diskibien :

— « Gwelet am-eus an Aotrou, ha kement-mañ eo bet lavaret din gantañ ».

Merher 23 a viz Gouere
Gouel Santez Berhed a Zued,
leanez, ken-batronez Europa

Mk 3, 31-35

³¹ Bez’ e oa Jezuz en eun ti, hag e tigouezas e vamm hag e vreudeur. Chom a rejont er-mêz avad, ha kas unan bennag da houlenn anezañ. ³² En-dro dezañ, e oa kalz tud azezet ; lavared a reer dezañ :

— « Aze er mêz, ema da vamm, da vreudeur ha da hoarezed o klask war da lerh ».

³³ Respont a reas dezo :

— « Piou eo va mamm ? Ha piou va breudeur ? »

³⁴ Hag o taoler e zellou war an dud azezet en-dro dezañ, e lavar :

³⁵ — « Setu va mamm ha va breudeur. An hini a ra bolontez Doue, hennez zo breur din, ha c’hoar din, ha mamm din ».

Yaou

Mz 13, 10-17

¹⁰ Tostaad a reas an diskibien ouz Jezuz, ha goulenn outañ :

— « Perag e komzez d’an dud dre barabolennou ? »

¹¹ — « Deoh-c’hwi, emezañ, eo roet da anaoud misteriou Rouantèlèz an neñv, med d’ar re-mañ n’eo ket. ¹² Roet e vo d’an neb e-neus, hag e vo puill-puill ar péz e-no ; an hini n’e-neus ket, e vo dilamet digantañ ar péz e-neus zokén. ¹³ Ma komzan dezo dre barabolennou, eo abalamour ma welont hep gweled, ha ma klevont hep kleved nag intent.

¹⁴ « Evel-se, e teu da wir evito komzou ar profet Izaïaz :

« Kaer ho-po kleved, ne intentot ket,
« kaer ho-po selled, ne welot ket.
¹⁵ « Poud eo deuet da veza spered an dud-se,
« stanket o-deus o diskouarn,
« serret o-deus o daoulagad,
« gand aon na zeufe o daoulagad da weled,
« o diskouarn da gleved,
« o spered da intent,
« o halon da drei ouz Doue,
« – hag e vint pareet ganin ».

¹⁶ « Evidoh-c’hwi, eüruz ho taoulagad, peogwir e welont, ho tiskouarn, peogwir e klevont. ¹⁷ E gwirionez, e lavaran deoh : c’hoant o-deus bet kalz a brofeted hag a dud santel da weled ar péz a welit, ha n’o-deus ket gwelet, da gleved ar péz a glevit, ha n’o-deus ket klevet ».

Gwener 25 a viz Gouere
Gouel Sant Jakez, mab Zebede, abostol

Mz 20, 20-28

²⁰ Tostaad a reas ouz Jezuz mamm Jakez ha Yann, paotred Zebede, gand he bugale. Stoui a reas dirazañ evid ober outañ eur goulenn.

²¹ Lavared a reas Jezuz dezi :

— « Petra az-peus c’hoant ? »

Respont a reas :

— « Setu amañ va daou vab : gourhemenn ma vezint azezet, unan en tu dehou dit, hag egile en tu kleiz, en da rouantèlèz ».

²² Respont a reas Jezuz :

— « N’ouzoh ket petra emaoh o houlenn ! Ha gouest oh da eva ar haliriad ez an da eva ? »

— « Ya, emezo, gouest om ! »

²³ Ha Jezuz dezo :

— « Va haliriad, eva a reot anezañ, med, beza azezet a-zehou pe a-gleiz din, me n’on ket evid an dra-ze. Roet e vo ar plasou-ze d’ar re e-neus va Zad kempennet anezo evito ».

²⁴ O kleved kement-se, ez eas an dég all droug enno a-eneb an daou vreur.

Med gervel a reas Jezuz anezo, ha lavared dezo :

²⁵ — « Gouzoud a ouezoh e ra renerien ar poblou payan o mistri warno, hag e lak ar pennou-braz-se o galloud da boueza warno.

²⁶ Ganeoh a-vad, ne vo ket kont evel-se. Er hontrol, an hini ahanoh a glask beza braz en ho touez, ra vo ho servicher deoh. ²⁷ Hag an hini ahanoh a glask beza ar henta, a vo sklav deoh.

²⁸ « Evel-se, n’eo ket deuet Mab an Dén evid beza servichet, med evid servicha, ha rei e vuhez evel dasprén evid an dud ».

Sadorn 26 a viz Gouere
Santez Anna, Mamm ar Werhez Vari,
kenta patronez Breiz

Mz 13, 11a.16-17

Lavared a ree Jezuz d’e ziskibien :

¹¹« — Deoh-c’hwi eo roet da anaoud misteriou Rouantèlèz an neñv.

¹⁶ « Eüruz ho taoulagad, peogwir e welont, hag ho tiskouarn, peogwir e klevont. ¹⁷ E gwirionez, e lavaran deoh : c’hoant o-deus bet kalz a brofeted hag a dud santel da weled ar péz a welit, ha n’o-deus ket gwelet, da gleved ar péz a glevit, ha n’o-deus ket klevet ».