Seitegved sizunvez war ar bloaz (C)

Euz ar 27 a viz Gouere d’an 2 a viz Eost 2025

Seitegved sul war ar bloaz (C)

Lk 11, 1-13

¹ Eun devez, e oa Jezuz o pedi, en eul leh bennag. Pa oe echu gantañ e bedenn, e lavaras dezañ unan euz e ziskibien :

— « Aotrou, desk deom pedi, evel m’e-neus Yann-Vadezour e-unan desket d’e ziskibien ».

² Lavared a reas Jezuz dezo :

« — Pa vezot o pedi, lavarit :

« Tad, da ano bezet santelleet,
« Da Rouantèlèz deuet deom.
³ « Ro deom ar bara on-eus ezomm bemdez.
⁴ « Pardon deom or pehejou, rag on-unan e pardonom da gement-hini e-neus greet gaou ouzom.
« Ha mir ouzom da goueza en tentadur ».

⁵ Lavared a reas Jezuz dezo c’hoaz :

— « Lakom e-nefe unan bennag ahanoh, eur mignon hag a zeufe d’e gaoud e-kreiz an noz da lavared dezañ : « Va mignon, prest din teir varaenn, ⁶ rag eur mignon din o veaji, a zo digouezet du-mañ, ha n’em-eus netra da ginnig dezañ ». ⁷ Ha ma respont egile euz diabarz an ti : « Laosk ahanon e peoh. Prennet eo bremañ an nor ; va bugale, koulz ha me, zo eet da gousked. Ne hellan ket sevel da rei eun dra bennag dit ». ⁸ Mad ! Lavared a ran deoh : goude ma ne zavje ket da rei dezañ e houlenn abalamour ma ’z eo e vignon, e savo koulskoude dre forz beza tregaset gantañ, hag e roio dezañ kement e-neus ezomm.

⁹ « Lavared a ran deoh : Goulennit, hag e vo roet deoh ; klaskit, hag e kavot ; skoit, hag e vo digoret deoh. ¹⁰ Rag an neb a houlenn, a reseo ; an neb a glask, a gav ; d’an neb a sko, e vez digoret dezañ.

¹¹ « Peseurt tad, en ho-touez, ma teu e vab da houlenn eur pésk digantañ, a rofe dezañ eun naer e leh eur pésk ? ¹² Ha ma houlenn eur vi, daoust hag e rofe dezañ eur grug ?

¹³ « Rag-se ’ta, ma ouezit c’hwi, daoust d’ar fall ma ’z oh, rei traou mad d’ho pugale, na pegement muioh ne roio ket an Tad euz an Neñv ar Spered-Santel d’ar re a houlenno digantañ ».

Lun 28 a viz Gouere
An Eskibien Santel,
savet ganto eskoptiou Breiz

Mz 28, 16-20

¹⁶ Mond a reas an unneg diskib da Vro-Halilea, beteg ar menez merket dezo gand Jezuz.

¹⁷ O weled anezañ, e stoujont dirazañ ; med lod anezo a jomas diskrédig. ¹⁸ Tostaad a reas Jezuz outo, hag e lavaras dezo :

— « Roet eo bet din pep galloud en neñv ha war an douar. ¹⁹ Kit eta ! An oll boblou, grit anezo diskibien din : roit dezo ar vadeziant, en ano an Tad, hag ar Mab, hag ar Spered-Santel. ²⁰ Deskit dezo mired kement am-eus gourhemennet deoh. Ha setu m’emaon-me ganeoh a-héd an oll zeveziou beteg fin ar béd ».

Lun

Mz 13, 31-35

³¹ Eur barabolenn all a roas Jezuz da gleved d’an dud :

— « Heñvel eo Rouantèlèz Doue ouz eur hreunenn zezo, e-neus eun dén kemeret hag hadet en e bark. ³² Ar bihanna euz an hajou eo. Med p’he-devez kresket, e vez ar brasa euz al legumachou. Sevel a ra da wezenn, ken ne teu al laboused an neñv da neizia en he skourrou ».

³³ Eur barabolenn all a lavaras dezo :

— « Heñvel eo Rouantèlèz an Neñv ouz eun tamm goell, kemeret gand eur vaouez, ha sanket e tri vuzuliad bleud, beteg ma vo savet an toaz en e béz ».

³⁴ Kement-se a lavare Jezuz dre barabolennou d’an dud, ha gwech e-béd ne gomze dezo nemed dre barabolennou.

³⁵ Evel-se, e teue da wir ar gomz lavaret gand ar profet : « Komz a rin dre barabolennou, embann a rin traou kuzet abaoe ar penn kenta ».

Meurz 29 a viz Gouere
Santez Marta

Lk 10, 38-42

³⁸ E-pad ma oa Jezuz hag e ziskibien oh ober hent, e tigouezas dezañ mond en eur gêriadenn, hag e oe digemeret gand eur vaouez, Marta heh ano, en he zi.

³⁹ Bez’ he-doa houmañ eur hoar, Mari heh ano : azezet e oa e-harz treid Jezuz, evid selaou e gomzou, ⁴⁰ e-keid ha ma oa Marta oh ober war-dro an ti, prés warni e-leiz. Chom a reas a-zav, hag e lavaras :

— « Aotrou, ha n’out ket nehet o weled va hoar o lezel ahanon va-unan da ober ar zervich ? Lavar dezi ’ta, dond da zikour ahanon ».

⁴¹ Med, respont a reas an Aotrou dezi :

— « Marta ! Marta ! nehet out ha tregaset gand eur bern traou. Unan hepkén a zo ezomm anezañ. ⁴² Dibabet he-deus Mari al lodenn wella, ha ne vo ket lamet diganti ».

pe : Yn 11, 19-27

¹⁹ Deuet e oa kalz a Juzevien da weled Marta ha Mari, da ober dezo gourhemennou a gañv evid o breur.

²⁰ Pa glevas Marta e oa Jezuz o tond, ez eas a-benn hent dezañ, e-keit ha ma chome Mari azezet en ti.

²¹ Lavared a reas Marta da Jezuz :

— « Aotrou, ma vijes bet amañ, ne vije ket marvet va breur. ²² Med bremañ c’hoaz, gouzoud a ran kement-se, petra bennag a houlenni digand Doue, a vo roet dit gantañ ».

²³ Respont a reas Jezuz dezi :

— « Sevel a raio da vreur a varo da veo ».

²⁴ — « Gouzoud a ran, a respont Marta, e savo da veo d’an deiz diweza, pa zavo da veo an oll dud varo ».

²⁵ Lavared a reas Jezuz dezi :

— « Me eo an adsav da veo hag ar vuhez ; an neb a gréd ennon – ha pa vefe marvet – a vevo ; ²⁶ ha kement hini a vév hag a gréd ennon, sur ne varvo ket da vikén. Ha kredi a rez kement-se ? »

²⁷ — « Ya, Aotrou, emezi, kredi a ran ez out ar Hrist, Mab Doue, an hini a zo o tond er béd ».

Meurz

Mz 13, 36-43

³⁶ Dilezet an dud gantañ, e teuas Jezuz d’ar gêr. Tostaad a reas e ziskibien outañ o lavared dezañ :

— « Displég deom frêz parabolenn an dreog er park ».

³⁷ Respont a reas :

— « An hini a had ar greun mad eo Mab an Dén. ³⁸ Ar park eo ar béd. Ar greun mad eo bugale ar Rouantèlèz. An dreog eo bugale an Droug. ³⁹ An enebour hadet an dreog gantañ eo an diaoul. An eost eo fin ar béd. An eosterien eo an êlez.

⁴⁰ « Evel ma vez tennet kuit an dreog da veza lakeet an tan, evel-se ive, e vo kont da fin ar béd. ⁴¹ Kaset e vo e êlez gand Mab an Dén, hag e vo tennet kuit ganto euz e Rouantèlèz, kement skwer fall ha kement dén a ra an droug ; ⁴² Taolet e vezint ganto e-kreiz an tan : eno e vo daelou ha skrignadeg dent. ⁴³ Neuze, e skedo an dud santel evel an heol e Rouantèlèz o Zad. An neb e-neus diskouarn da gleved, ra glevo ! »

Merher

Mz 13, 44-46

Lavared a ree Jezuz ar parabolennou-mañ d’an dud :

⁴⁴ — « Heñvel eo Rouantèlèz Doue ouz eun teñzor bet kuzet en eur park ; kavet eo gand eun dén, hag a guz anezañ en-dro. Leun a levenez, ez a da werza kement a zo dezañ, hag e prén ar park.

⁴⁵ « Heñvel eo c’hoaz Rouantèlèz Doue ouz eur marhadour o klask perlez kaer. ⁴⁶ Kavet gantañ eur berlezenn a dalvoudegez vraz, ez a da werza kement a zo dezañ, hag e prén ar berlezenn ».

Yaou

Mz 13, 47-53

Lavared a ree Jezuz ar parabolennou-mañ d’an dud :

⁴⁷ « Heñvel eo c’hoaz Rouantèlèz Doue ouz eur roued taolet er mor hag a zeu gantañ pesked a bep seurt. ⁴⁸ Pa vez leun, e vez sachet gand ar besketerien war an aot ; azeza a reont hag e vez dastumet ar re vad e panerou, ha taolet kuit ar re na dalvezont netra.

⁴⁹ « Evel-se, e c’hoarvezo da fin ar béd : dond a raio an êlez da zibab ar re fall a-douez ar re just, ⁵⁰ ha stlepel anezo e-kreiz an tan : eno e vo daelou ha skrignadeg dent.

⁵¹ Daoust ha komprenet ho-peus kement-se ? ».

— « Ya ’vad, emezo ».

⁵² Hag e lavaras dezo :

— « Setu perag, kement skrib deuet da veza diskib Rouantèlèz Doue, zo heñvel ouz eur penn-tiègèz hag a denn euz e deñzor traou nevez ha traou koz ».

⁵³ Echu gantañ e barabolennou, ez eas Jezuz kuit ahalese.

Gwener

Mz 13, 54-58

⁵⁴ Mond a reas Jezuz en e vro, hag e kelenne an dud en o zinagogennou, en doare ma choment souezet ha ma lavarent :

— « Euz peleh e teu dezañ ar furnez hag ar burzudou-ze ? ⁵⁵ Daoust ha n’eo ket mab ar halvez ? Daoust ha n’eo ket Mari ano e vamm ? Ha Jozef, Simon ha Jud, ano e vreudeur ? ⁵⁶ Hag e hoarezed, daoust ha n’emaint ket oll en on-touez ? Euz a beleh e teu eta, kement-se dezañ ? » ⁵⁷ Hag e oant feuket gantañ.

Lavared a reas Jezuz dezo avad :

— « Ne vez disprizet eur profet, nemed en e vro hag en e diad ».

⁵⁸ Ha ne reas ket kalz a vurzudou eno, abalamour ma ne gredent ket.

Sadorn

Mz 14, 1-12

¹ En amzer-ze, e klevas Herodez, hag a oa e penn Bro-Halilea, ano euz ar vrud greet diwar-benn Jezuz, ² hag e lavaras d’e zervicherien :

— « Yann-Vadezour eo hennez ; adsavet eo a-douez ar re varo ; ha setu perag e ra burzudou ».

³ Rag greet e-noa Herodez tapoud krog e Yann, chadenna anezañ ha taoler er prizon. Bez’ e oa abalamour da Herodiadez, gwrég Filip, e vreur. ⁴ Ewid gwir, lavaret e oa bet dezañ gand Yann :

— « N’az-peus ket urz da gaoud anezi da wrég. »

⁵ C’hoant e neveze da gas anezañ d’ar maro, med aon e-noa bet rag an dud, hag a ree eur profet euz Yann.

⁶ Hogen da geñver deiz-ha-bloaz ganedigez Herodez, e tañsas merh Herodiadez dirag an oll, hag e plijas kement da Herodez, ⁷ ma touas dre le, rei dezi kement a houlennfe. ⁸ Atizet gand he mamm, e lavaras ar verh :

— « Ro din amañ, war eur plad, penn Yann-Vadezour ».

⁹ Rannet braz e oe kalon ar roue, med abalamour d’e le ha d’an dud a oa gantañ ouz taol, e roas urz da rei dezi he hoant, ¹⁰ ha da zibenna Yann er prizon.

¹¹ Digaset e oe ar penn war eur plad, ha roet d’ar plah yaouank. Ha kaset e oe ganti d’he mamm.

¹² Dond a reas diskibien Yann da gerhad ar horv, hag e oe lakeet en eur béz ganto. Goude-ze, ez ejont da gas kelou da Jezuz.