Aviel hervez sant Lukaz
Pennad 9

MISION AN DAOUZEG ABOSTOL

¹ O veza bodet an Daouzeg e roas galloud dezo ha beli war an oll zroug-sperejou ha galloud da barea ar hleñvejou.

² O has a reas da embann Rouantèlèz Doue ha da barea ar re glañv. ³ Hag e lavaras dezo :

— « Na gemerit netra ganeoh evid an hent, na baz, na sah, na bara, nag arhant. N’it ket da gaoud diou zae pep hini. ⁴ E ti pe di ma ’z it ennañ, chomit eno. Ahano eo ez eoh pelloh.

⁵ « Ma ne vez ket greet digemer deoh, en eur guitaad ar gêr-ze, c’hwi a hejo ar boultren diwar ho treid : Eun testeni a-eneb dezo e vo kement-se ».

⁶ Mond a rejont gand o hent, a gêriadenn da gêriadenn, en eur embann ar Helou Mad hag o parea ar re glañv e pep leh.

HERODEZ HA JEZUZ

⁷ Herodez, an Tretrark, e-noe kelou euz ar pez a dre-mene, hag e oe nehet. Rag darn a lavare e oa savet Yann a varo da veo.

⁸ Re all, e-noe en em ziskouezet Eliaz. Re all, e oa savet a varo da veo unan euz ar brofeted a-wechall.

⁹ Herodez a lavaras :

— « Yann… Me va unan am-eus laket e zibenna. Med piou eo hemañ a glevan kemend-all diwar e benn ? »

Hag e klaske e weled.

DISTRO AN EBESTEL AR BARA KRESKET

¹⁰ Deuet en-dro e kontas an ebestel da Jezuz kement o-doa greet. O has a reas gantañ, hag eh en em dennas en eul leh distro diouz kostez eur gêr anvet Betsaida.

¹¹ Pa glevas an dud, ez ejont d’e heul. Jezuz a reas digemer dezo. Komz a ree dezo euz Rouantèlèz Doue ha parea a reas ar re glañv.

¹² An deiz a oa war e ziskar ; an Daouzeg a dosteas outañ hag a lavaras :

— « Grit d’an dud-se mond kuit, ma ’z aint d’ar bourhadennou ha d’ar hêriou tro-war-dro da glask lojeiz ha bevañs, rag amañ emaon en eul leh digenvez ».

¹³ Jezuz a lavaras dezo :

— « Roit dezo, c’hwi hoh unan peadra da zebri ». Respont a rejont :

— « N’on-eus nemed pemp baraenn ha daou besk, nemed ha mond a rafem, ni on-unan, da brena peadra da zebri evid an oll dud-se ».

¹⁴ Bez’ e oa war-dro pemp mil gwaz anezo. Jezuz a lavaras d’e ziskibien :

— « Grit dezo azeza a hanter-kanchou ».

¹⁵ Senti a rejont hag e lakjont an oll da azeza.

¹⁶ Jezuz a gemeras ar pemp baraenn hag an daou besk, hag en eur zevel e zaoulagad war-zu an Neñv, o bennigas, a reas tammou anezo, hag o roas d’e ziskibien evid o ingala e-tre an oll.

¹⁷ Debri a rejont oll ouz o naon, hag e oe dastumet an tammou chomet euz o dilerh : peadra da garga daouzeg paner.

PROFESION SANT PER

¹⁸ Eun devez m’edo Jezuz o pedi en eul leh distro, hag e ziskibien en-dro dezañ, e reas outo ar goulenn-mañ :

¹⁹ — « Hervez an dud, piou on-me ?  » Hag int-i a respontas :

— « Yann Vadezour, pe hervez re all : Eliaz ; evid re all c’hoaz : unan euz ar brofeted a-wechall, savet da veo ».

²⁰ Jezuz a lavaras dezo :

— « Ha c’hwi, piou a lavarit ez on-me ?  » Pèr a respontas :

— « Mesiaz Doue ».

²¹ Neuze Jezuz a zifenn outo rust lavared kement-se da zen e-béd, ²² en eur lavared ouspenn :

— « Red eo da Vab an Den gouzañv kalz poaniou, beza distaolet gand Pennou-Braz ar bobl, ar Veleien-Vraz hag ar Skribed, beza laket d’ar maro ha sevel da veo d’an trede deiz ».

EVID HEULIA JEZUZ

²³ Neuze e lavaras d’an oll :

— « An hini e-neus c’hoant dond d’am heul, dezañ trei kein dezañ e-unan, dougenn e groaz bemdez ha dond d’am heul.

²⁴ « Rag an neb a ’fello dezañ savetei e vuez he hollo, med an hini a gollo e vuez ablamour din a zaveteio anezi.

²⁵ « Da betra e talvez d’an den gounid ar béd a-bez ma teu dezañ en em goll, pe ober gaou outañ e-unan.

²⁶ « Rag, an neb e-no bel méz ahanon hag euz va homzou, hennez e-no Mab an den méz anezañ pa zeuio en e hloar hag e gloar an Tad hag an êlez.²⁷ « E gwirionez m’hel lavar deoh, e-touez ar re a zo amañ, ez eus lod ha ne varvint ket a-raog beza gwelet Rouantèlèz Doue  » [20].

JEZUZ TREUZFURMET

²⁸ Eun eiz devez bennag war-lerh ar homzou-ze, e kemeras Jezuz gantañ Pèr, Yann ha Jakez, hag e pignas war ar menez da bedi.

²⁹ Endra m’edo o pedi e teuas e zremm da jeñch hag e zillad da veza gwenn-kann ha lugernuz. ³⁰ Daou zen a oa o tivizoud gantañ : Moizez hag Eliaz. ³¹ Deuet da bara er hloar, e komzent euz ar himiad edo o vond da ober e Jeruzalem.

³² Pèr hag an daou all a oa maro gand ar hoant-kousked, med chomet e oant dihun, hag e weljont gloar Jezuz hag ive an daou zen en e-gichenn.

³³ Pa edo ar re-mañ o kuitaad Jezuz e lavaras Pèr dezañ :

— « Mestr, brao eo deom beza amañ, savom teir deltenn : Unan evidout, unan all evid Moizez hag e-bén evid Eliaz ».

Ne ouie ket petra ’lavare. ³⁴ Endra m’edo o komz evel-se, e teuas eur goabrenn da leda he skeud warno, hag e krogas aon enno oh antreal er goabrenn.

³⁵ Eur vouez a oe klevet o tond euz ar goabrenn. Lavared a ree :

— « Hemañ eo va Mab muia karet, selaouit anezañ ».

³⁶ E-pad ma komze ar vouez en em gavas Jezuz e-unan-penn. An diskibien a jomas peoh ha ne lavarjont netra da zen e-béd, d’ar mare-ze, euz ar pez o-doa gwelet.

AN DEN A OA AN DIAOUL ENNAÑ

³⁷ Antronoz, p’edont o tiskenn diwar ar menez, e teuas eun niver braz a dud en arbenn da Jezuz. ³⁸ Ha setu ma krias eun den euz a greiz an dud :

— « Mestr, sell ouz va mab, me az péd, rag n’am-eus nemetañ a vugale. ³⁹ A-wechou e vez dalhet gand eur spered. A-greiz pep kreiz e teu dezañ krial. E lakaad a ra da gaoud glizi gand an eonenn en e henou. Ha n’eo ket hep poan ez a kuit anezañ ouz e lezel torret e gorv.

⁴⁰ « Goulennet am-eus digand da ziskibien e argas, ha n’int ket bel deuet a-benn ».

⁴¹ Jezuz a respontas :

— « Rummad tud diskredig ha fallagr, beteg pe vare e vezin-me ganeoh hag e rankin ho kouzañv ?… Digas da vab amañ ! »

⁴² A-veh m’edo ar hrouadur o tond, ma oe stlapet d’an douar gand an diaoul hag hejet gand glizi. Med Jezuz a hourdrouzas ar spered hudur. Parea ’reas ar hrouadur, hag e renta d’e dad.

⁴³ Skoet e oe spered an oll gand brasier Doue. O veza ma oant oll estlammet o weled kemend a ree, e lavaras Jezuz d’e ziskibien :

⁴⁴ — « Selaouit mad ar pez emaon o vond da lavared deoh : Mab an Den a zo o vond da veza lakeet etre daouarn an dud ».

⁴⁵ Med ne intentent ket ar gomz-se : dam-guzet e chome evito evid na zeufent ket da intent ; ha ne gredent ket ober goulennou outañ war ar poent-se.

PIOU EO AR BRASA ?

⁴⁶ Eur goulenn a zavas en o spered : daoust ha pehini anezo e oa ar brasa ?

⁴⁷ Jezuz o houzoud petra ’zoñjent, a gemeras eur hrouadur, e lakeas en e-gichenn, ⁴⁸ hag a lavaras :

— « An neb a zigemer ar bugel-mañ em ano, am digemer, me va-unan, hag an neb am digemer a zigemer an hini e-neus va haset, rag an hini bihanna en ho-touez hennez eo ar brasa ».

⁴⁹ Neuze e komzas Yann :

— « Mestr, emezañ, gwelet on-eus eun den oh argas an droug-sperejou en da ano, hag on-eus miret outañ d’henn ober ablamour ma ne zeu ket d’az heul, ganeom-ni ».

⁵⁰ Med Jezuz a respontas dezo :

— « Na virit ket outañ, rag an neb n’ema ket a-eneb deoh a zo a-du ganeoh ».

EN HENT DA JERUZALEM

⁵¹ O veza ma tostae an deveziou ma tlee kuitaad ar béd-mañ, Jezuz a yeas en hent da vad war-zu Jeruzalem [21].

⁵² En e-raog e kasas kannaded. Ar re-mañ a yeas en eur vourhadenn Samaritaned evid reñka kemend a oa réd. ⁵³ Med an dud ne ’fellas ket dezo e zigemer ablamour m’edo o vond da Jeruzalem [22].

⁵⁴ O weled kement-se, e ziskibien, Jakez ha Yann, a lavaras :

— « Aotrou, ma karez e lavarim d’an tan diskenn euz an Neñv d’o distruja ».

⁵⁵ Jezuz a droas outo hag o gourdrouzas. ⁵⁶ Hag ez ejont d’eur vourhadenn all.

HEULIA JEZUZ DREIST PEP TRA

⁵⁷ E-pad o beaj e teu eun den da lavared da Jezuz :

— « Me’yelo d’az heul e kement leh ma ’z i.

⁵⁸ Ha Jezuz ha respont dezañ :

— « Al lern o-deus o zoullou, laboused an Neñv o neiziou ; Mab an Den a-vad n’e-neus leh e-béd da ziskuiza e benn ».

⁵⁹ Da unan all e lavaras :

— « Deus d’am heul ». Hag hemañ a respontas :

— « Va lez da genta da vond da zebelia va zad.

⁶⁰ Ha Jezuz a respontas dezañ :

— « Lez ar re varo da zebelia ar re varo. Evidout-te, kerz da embann Rouantèlèz Doue » [23].

⁶¹ Unan all c’hoaz a lavaras dezañ :

— « Aotrou, mond a rin d’az heul, med a-raog, ro aotre din da lavared kenavo da dud va zi ».

⁶² Ha Jezuz dezañ :

— « An neb a zell a-dreñv, goude beza kroget en alar, n’eo ket greet evid Rouantèlèz Doue ».